Endamê Rêveberiya PÇDK’ê Fehmî Mihemed di daxuyaniya ku da malpera fermî ya partiya xwe de got, “Seytereya Partiya Demokrat a Kurdistan (PDK) ya li devera Baleyan piştî bi qasî saetekê em rawestandin,  ji me re gotin ku, ‘Em rê nadin endamên Partiya Çareseriya Demokratîk a Kurdistan (PÇDK) biçin û werin û em ê rê nedin ku kar û çalakiyên xwe bikin, ji ber ku ferman ji jor ve ji me re hatiye.’”

Ji ber karûbarên rêxistinî û ji bo amadekariyên hilbijartinê Endamê Encûmeniya (PÇDK)’ê Fehmî Mihemed xwest serdana devera Baleyan bike, lê rastî astengiya seytereya girêdayî (PDK)’ê ya li Qesrê hat.

Derbarê vê mijarê de Fehmî Mihemed wiha got: “Rêveberiya seytereya asayîşê ya Qesrê ji min re ragihandin ku ji jor ve ji wan re hatiye gotin, bi tu rengî divê rê neyê dayin ku endamên PÇDK'ê kar û çalakiyên xwe yên ji bo rêxistinî û hilbijartinê li devera Baleyan bikin.” Mihemed diyar kir ku ew nêzî saetekê li seyterê hatiye rawestandin û rê nedane ku derbas bibe.  

Fehmî Mihemed her wiha destnîşan kir ku, ev ne cara despêkê ye ku seytereyên girêdayî  PÇDK’ê  vê yekê dikin. Gelek caran endam, dost û alîgirên partiya wan bi awayekî sîstematîk rastî astengiyan tên.  Mihemed da zanîn ku ev nîşaneya nedemokratîkbûnê û neneteweyîbûnê dide diyarkirin û axaftina xwe wiha domand: “Ez vê helwesta wan şermezar dikim û em ê li hember van hemû astengiyan li ber xwe bidin û têkoşîna xwe xurttir bikin. Ev astengî wê nebin sedem ku me ji kar û xebatên me dûr bixe. Niha li Herêma Kurdistanê proseya hilbijartinê bi rê ve diçe, ji bo wê tirsek mezin a PDK’ê  ji vê yekê heye û ji bo wê astengiyan ji bo beşdarbûneke aktîf a partiya me ya ji bo hilbijartina Parlemana Kurdistanê dike.”