Şehîdên meha Gulanê li paytexta Elmanya Berlinê hatin bîranîn. Merasîma bîranînê ji aliyê NAV-DEM û Meclîsa Jinê ya Berlinê DEST-DAN ve hate organîzekirin. Piştî deqeyeke rêzgirtinê ji bo bîranîna şehîdan, bi navê saziyan qiseker axivîn û dilsoziya xwe ya bi şehîdan re anîn ziman.

Nûnera Komîsyona Malbatên Şehîdan Gozê Çalkan diyar kir ku şehîdên meha Gulanê şehîdên Kurdistanê ne û ew ê li ser şopa wan bimeşin.

Siyasetmedarê Kurd Mûharrem Aral jî got, "Hakî Karer xeta Rêbertî baş fêhm kir û bi cih anî. Şehîdên meha Gulanê kadroyên pêşeng û hevrêyên me bûn ku hîmê partîbûnê danîn. Denîz, Îbrahîm û şehîdên me yên partiyê şehîdên me hemûyan e."

Ji Yekîtiya Jinên Sosyalîst (SKB) jî Seher Yeter işaret bi wateya dîroka şehîdan kir û got, "Bîranîna wan meşa li ser şopa wan e. Bicihanîna xewn û xeyalên wan e."

Endama TJK-E Nûpel Mûnzûr jî diyar kir ku şehîdên meha Gulanê di dîroka Tevgera Azadiyê ya Kurd de xwedî cihekî cuda ye.

Civîna bîranînê bi qîrîna dirûşma "Şehîd namirin" qediya.