Di rûniştina Lijneya Giştî ya Parlementoya Ewrûpayê de ev peyam hate dayîn ku Tirkiye bultena sor a Înterpolê sûîstîmal dike. Li ser navê serokiya demkî ya YE’yê Mattî Maasîkas diyar kir ku ew ê ji Înterpolê bixwazin ku bila pêkanîna xwe ya bultena sor ji ber çavan derbas bikin. Maasîkas destnîşan kir ku bultena sor a Înterpolê ji bo radestkirina sûcdaran divê neyê bi kar anîn û biryarên îadekirinê girêdayî kontrolkirina darazê û pêvajoya wê ye.

BERPIRSYARÎ YA ÎNTERPOLÊ YE

Komîsera ji Edalet, Berxurî û Wekheviya Zayendî berpirsyar Vera Joûrova li ser navê komîsyonê axivî û diyar kir ku bultena sor a înterpolê ji aliyê hin welatiyan bi armanca siyasî tê bi kar anîn û fikarên xwe yên di vî warî de vegot.

Joûrovayê got ku heke pergala Înterpolê were sûîstîmal kirin, berpirsyariya tevdîran aîdî Înterpolê ye.

TIRKIYE, RÛSYA, ÎRAN û ÇÎN SÛÎSTÎMAL DIKIN

Gelek parlementerên ku di Lijneya Giştî de axivîn diyar kirin ku Tirkiye, Rûsya, Îran û Çîn bultena sor a Înterpolê ‘ji bo bêdengkirina mûxalîfên siyasî’ bi kar tînin.

Di meha Nîsanê Meclîsa Parlementeran a Konseya Ewrûpayê diyar kiribû fikarên wan gelekî zêde ne û biryarek wergirtibûn. Di biryarê de hatibû xwestibûn ku, “Heke fikar hebin ku bultena sor hatiye sûîstîmalkirin dikarin di bingeha van bultenan de girtinan nekin.”

Tê zanîn ku têkildarî bultena sor a Înterpolê pêvajoyeke reformê jî heye.