Çalakiyên ji bo bidawîkirina tecrîdkirina Rêberê Gelê Kurd Abdullah Ocalan tên lidarxistin, didomin. Çalakgeran bal kişandin ser berxwedana grevên birçîbûnê.

BERLÎN: Li paytexta Elmanya Berlînê, Kurdistanî li Alexanderplatzê li hev civiyan û ji bo bêdengiya li pêşberî berxwedana greva birçîbûnê şermezar bikin xwestin mîtîngekê li dar bixin. Lê belê polîsên Berlînê beriya destpêkirina mîtîngê dest li Kurdistaniyan û dostên wan werdan. Polîsên Berlînê destûr nedan pankartên ku nêzî 4 meh in di her meş û mîtîngê de tên hildan. Polîsan her wiha gef li çalakgeran xwarin û gotin nîşaneya 'serketinê' qedexe ye, lewma wê dest li wan werdin. Li ser vê yekê Kurdistaniyan helwesta polîsên Berlînê jî protesto kirin. Endamê Meclîsa Gel a NAV-DEM'ê ya Berlînê Alî Susem helwesta polîsan weke diyariyeke beriya hilbijartinê ji bo Erdogan bi nav kir. Hevserokê NAV-DEM'ê yê Berlînê Yeko Ardil jî diyar kir, heta ku tecrîdkirina Ocalan bi dawî bibe wê têkoşîna xwe bidomînin.

DRANCY: Li banliyoya Drancy a paytexta Fransa Parîsê, Navenda Civaka Demokratîk a Kurd çalakiyek pêk anî. Li ber avahiya şaredariya Drancyê pankarta bi nivîsa 'Azadî ji Ocalan re' hate vekirin û bang hate kirin, ku dawî li bêdengiya li pêşberî çalakiya grevên birçîbûnê bê anîn. Di çalakiyê de li ser tecrîdê û berxwedana grevên birçîbûnê gelek belavok hatin belavkirin.

EVRY: Li banliyoya Evry a Parîsê jî Kurdistaniyan li dijî tecrîdê çalakiya protestoyî pêk anîn. Girseya gel li ber Navenda Civaka Demokratîk a Kurd (NCDK) li hev civiyan. Siyasetmedarê Kurd Firat Varto di çalakiyê de axivî û bang kir ku hîn bi xurtî piştgirî ji berxwedêrên greva birçîbûnê re bê dayin û tecrîd ji holê bê rakirin.

FRANKFURT: Li bajarê Frankfurt ê Elmanyayê, Meclîsa Jinê ya Amara ya Frankfurtê û Meclîsa Jinê ya Sara ya Offenbachê bi heman armancê çalakiyek li dar xistin û gelek jin tevlî bûn. Di çalakiyê de hate bibîrxistin ku grevên birçîbûnê li asta krîtîk in û bang li raya giştî hate kirin ku bala xwe bide ser mijarê. Di çalakiyê de gelek belavok hatin belavkirin.

GRAZ: Tecrîdkirina Rêberê Gelê Kurd Abdullah Ocalan li bajarê Grazê yê Awûstûryayê bi çalakiyekê hate şermezarkirin. Di çalakiyê de li ser mijarê belavok hatin xwendin û belavkirin.

GAVLE: Kurdistaniyên li bajarê Gavle yê Swêdê, li dijî tecrîdê daketin qadan. Di çalakiyê de ji raya giştî ya Swêdê re belavok hatin belavkirin û agahî hate dayin ku zêdeyî 5 hezar girtî li Tirkiyeyê di greva birçîbûnê de ne. Her wiha bang li Swêdê û Yekîtiya Ewropayê hate kirin ku li dijî tecrîdê bikevin nava liv û tevgerê. Ji gelê Swêdê jî hate xwestin ku Tirkiyeyê boykot bike.