Kurdistaniyên li Ewropayê dijîn, ji bo berxwedana bêhempa ya Efrînê ku 40 roj in li dijî dagirkeriya dewleta Tirk dewam dike, duh jî daketin qadan.

SAARBRUCKEN: Li bajarê Saarbrucken ê Elmanyayê, li ber Europa Galerî konê agahdarkirinê hate vedan. Di çaakiyê de li ser komkujiyên ku dewleta Tirk li Efrînê kiriye belavok hatin belavkirin. Hevserokê Navenda Civaka Demokratîk a Kurd a Saarbruckenê Orûç Dapar li qada çalakiyê axivî û bang li Kurdistaniyên li eyaleta Saarlandê dijîn kir ku xwedî li berxwedana li Efrînê derkevin.

RECKLÎNGHAÛSEN: Li dijî êrîşên dagirkeriyê yên dewleta Tirk ên li ser Efrînê, Kurdistanî li bajarê Recklînghaûsen ê Elmanyayê meşiyan. MLPD'ê jî destek dan çalakiyê. Piştî meşê mîtîngek hate lidarxistin û Hevserokê Meclîsa Gel a Essenê Tekîn Arslan lê axivî. Arslan destnîşan kir ku Erdogan ê ku mejiyê wî mejiyê DAÎŞ'ê ye li pêşberî berxwedana Efrînê têk çûye.

KAPLÎNFORT: Kurdistaniyan tevî dostên xwe li bajarokê Kaplînfortê bi pêşengiya Meclîsa Jinê ya Asya Yuksel a Dûîsbûrgê çalakiyek li dar xistin. Ji bo şermezarkirina çekên ku Elmanya dide dewleta Tirk, Kurdistanî li ber avahiyên CDU, SPD û Şaredariyê çalakiya bêîteatiya sivîl li dar xistin. Çalakgeran her wiha li nava avahiyên partiyên navborî pankarta bi nivîsa "Çekên Elman û dewleta Tirk ji Efrînê bicehimin" vekirin.