Hêzên dewletê ku di dema berxwedana xwerêveberiyê de bi hezaran leşker, polîs û çekên giran êrîş kirin û hê jî dor li bajarên Kurdan girtine, li navenda bajaran wesayîtên zirxî bi lezeke zêde dajon û terorê bi ser gel ve dimeşînin.

Wesayitên zirxî ku bi taybetî gefê li jiyana zarokan dixwin, weke gelek bajarên Kurdistanê li Kerboranê careke din jî zarokek kuştin. Berfîn Dîlek a 7 salî ku xwendekara dibistana seretayî bû, dema ku ji dibistanê derdiket ji hêla mekîneyên kuştinê yê dewletê ve ku ceribandina lezê dikir hate kuştin. Bedena Berfîn a ku bi hovane hate kuştin nedihate naskirin.

Şêniyên navçeyê dibêjin, dema ku Berfîn a biçûk hat kuştin, dema derketina zarokan ji dibistanê bû û anîn ziman, "Polîs bi taybetî di van saetan de dilezînin. Di bûyera kuştinê ya duh de jî, tevî ku polîsan dizanîbûn dema derketina zarokan a ji dibistanê ye, bi wesayîta zirxî bi lez ji ber dibistanê diçûn. Em ê vê zilmê qebûl nekin."

MALBATÊ BANG KIR

Dayik û bavê Berfîna biçûk, ji ber ku bedena keça wan di binê wesayîta zirxî de eciqî nekarîbûn nas bikin. Dayik û bav wê dozê li kujeran veke. Malbatê dibêje, zaroka wan ne bi qezayê, bi zanebûn hatiye kuştin û bang li her kesî kir, ku bala xwe bidin ser bûyerê.

BI DEHAN ZAROKÊN KURD JIYANA XWE JI DEST DAN

Tevî komkujiyên bi tank, top û bi destê leşker û polîsan li Kurdistanê tên kirin, kuştina bi wesayîtên zirxî jî ne kêm e. Heta niha bi wesayîtên zirxî bi dehan zarokên Kurd hatine kuştin.