Parlamenterên HDP'ê yên Amedê, li dijî tecrîdkirina Rêberê Gelê Kurd Abdullah Ocalan dest bi greva birçîbûnê ya ji bo 3 rojan kirin. Çalakî li Salona Konferansê ya Vedat Aydin a li avahiya HDP'ê ya bajêr dest pê kir. Wekîlên Amedê Selçûk Mizrakli, Dersim Dag, Remziye Tosûn, Semra Guzel, Mûsa Farisogûllari û Salîha Aydenîz tevlî bûn. Wekîlên HDP'ê beriya çalakiyê daxuyaniyek dan çapemeniyê.

Parlamenter Selçûk Mizrakli daxuyanî da û bi bîr xist ku greva birçîbûnê ya Hevseroka KCD'ê Leyla Guven di roja 26'an de ye.

Mizrakli bal kişand ser êrîşa polîsan a li greva birçîbûnê ya li Mersînê û anî ziman, hikumeta AKP'ê bi vê zext û zordariya li çalakiyên aştiyane û çareseriyê dike, neçareseriyê ferz dike.

Mizrakli diyar kir, ji bo dengê çalakgerên li dijî tecrîdê bedena xwe danîne ber mirinê, dest bi greva birçîbûnê ya ji bo 3 rojan dikin.

Mizrakli bang li desthilatdariya siyasî kir ku bi erk û berpirsyariya xwe rabe û got, "Em dixwazin bersiv ji vê daxwaza însanî re bê dayin û rêya çareserî û diyalogê bê hilbijartin. Eger di çalakiyên greva birçîbûnê de rewşeke neyînî biqewime, berpirsyarê vê hikumet e. Em bang li desthilatdariya siyasî dikin ku guh bidin dengê ji girtîgehan bilind dibe û ji bo çareseriya pirsgirêkan rêya diyalogê vekirî bihêle."