Koordînasyona Giştî ya Rojava, şehîdên komkujiya 12’ê Adara 2004’an bibîr anî û destnîşan kir, ku Şoreşa Rojava; li dijî rejîma Baas û komkujiyan, encama serhildanên gel e.

Di daxuyaniyê de wiha hat gotin:

"Roja 12`ê Adarê gelê me li dijî desthilatdaran rabû serhildanê. Desthilatdaran dixwestin vîna gelê me bişkîne. Lê belê vîna gelê me û lêgerînên wan ên azadiyê hêz da wan ku li dijî zilmê rabin serhildanê. Çirûska serhildanê li bajarê Qamişlo pê ket. Ev çirûsk ji Qamişlo belavî Kobanê, Efrîn, Şam û Helebê belav bû û gel bi wêrekî li dijî desthilatdaran rabûn serhildanê.

Gelê me di Şoreşa Rojava de ji hemû aliyan ve gihîşte serketinên mezin. Ji gelek eniyan ve li dijî dagirkerî û terorê têdikoş e. Gelê me ji cîhanê re isbat kir ku ew dikare projeya demokratîk a li ser bingehê netewa demokratîk û biratiya gelan hatiye avakirin, biserbixîne û ev serketin encama serhildana 12`yê Adarê ye.

Em weke Koordînasyona Rêveberiya Xweseriya Demokratîk kiryarên rejîmê ku li ser gelê me daye meşandin û di encamê de bi dehan şehîd û birîndarên me çêbûn, şermezar dikin. Em soz didin ku li ber xwe bidin û bi ruhê Serhildana 12'ê Adarê têbikoşin. Armanca şoreş û projeya me ya demokratîk ew e ku Sûriyeyê û giştî herêm bigihîje rewşeke bi ewle û aram."