Piştî 45 rojan duh di saetên sibehê de dema bangeşeyên hilbijartinên encumenên parêzgehan temam bû û bi awayekî fermî ji hêla Komîsyona Serbixwe ya Hilbijartinên Iraqê ve hate bidawîkirin û îro jî saetên sibehê de hilbijartina taybet destpê kir.

Di hilbijartina taybet a îro de polîs, artêş, Heşdî Şe’bî û hemû ew beşên wezareta navxwe û wezareta parastinê dengên xwe bi kar tînin.

Li gorî zanyariyên Komîsyona Serbixwe ya Iraqê li Kerkûkê 57 hezar dengderên taybet hene û ji bo van dengderan îro li Kerkûkê 161 cihên dengdanê hatine danîn.

Hilbijartinên Encumena Parêzgeha Kerkûkê piştî 18 salan cara yekem e ku tê lidarxistin. Ji ber ku berî niha bi hincetên rewşa taybet ên deverên Kurdistanî yên veqetandî ku di navber hikûmeta Iraq û Herêma Kurdistanê da nakokî li ser wan heye, li van deveran hilbijartin nedihate kirin.

Piştî bûyerên Referandûm û 16’ê Cotmehê bi wekalet parêzgarekî şoven ê Ereb bi ser Kerkûkê de hate ferzkirin. Lewma aliyên siyasî yên Kurd bi xurtî xebatê dikin da ku bi awayekî herî zêde xelkê bibin ser sindoqên dengdanê û zêdetirîn rêjeya dengan bi dest bînin.

Li gorî zanyariyên Ofîsa Kerkûkê ya Komîsyona Serbixwe ya Hilbijartinên Iraqê li Kerkûkê mafê dengdanê yê mîlyonek û 15 hezar û 3 sed kesî heye. Li gorî amarên Komîsyonê ji bo hemwelatiyan 813 hezar kartên elektronîk hatine amadekirin û %75ê hemwelatiyên Kerkûkê kartên xwe wergirtine.