Welatiyên ku salên 1990'î de ji ber zext û zordariya dewleta Tirk ji warên xwe koçberî Başûrê Kurdistanê bûn û niha di kampên Başûrê Kurdistanê de dijîn, bi gefên PDK'ê rû bi rû ne.

Hat ragihandin, Asayîşa PDK'ê ya Duhokê nêzî hefteyeke bendên kontrolê datînin ser rêyên kampan û dest datîne ser îkameyên welatiyan.

Li gorî welatiyekî ji Rojnewsê re axivî û nexwest navê xwe ji ber ewlekariyê eşkere bike, PDK zextan li wan dike û 3 pêşniyaran li ser wan ferz dike.

Kesê navborî got, "Ya yekem dibêjin êdî hûnê bi ti şêweyî ji kampên xwe dernekevin. Ya 2. dibêjin, yan hûnê biçin Mexmûr û Rojava, ya 3. jî dibêjin em ê we radestî Tirkiyeyê bikin. Li Asayîşê listeyeke ji navê 50 malbatan heye. Li gorî wê lîsteyê îkameyên welatiyan ji wan digrin û nadin wan. Niha îkameya gelek welatiyan jê girtine. Li kampa me rewş ne başe, ceyranê li ser me qut dikin, ketin û derketina ji kampan hatiye qedexekirin."

Hêjayî gotinê ye ku li herêma Dihokê  kampên wek Misirîk,Qesrok, Hesenîk û Şêxan gelek welatiyên ji bakurê Kurdistanê di salên 1990’î de ji ber êrîş û zexta dewleta Tirk koçî Başûrê Kurdistanê bibûnû niha jî PDK zextê li ser wan dike ku Başûrê Kurdistanê biterikînin.