Malbata Abdulkerîm Talli (25) û Ahmet Talli (32) ên ji Wargeha Penaberan a Rustem Cûdî (Mexmûrê) ku li Swîsreyê serlêdana penaberiyê kirin, lê belê serlêdana wan nehate qebûlkirin û li ber dersînorkirinê ne, bang kirin.

Bavê her du penaberan Mehmet Emîn Talli bal kişand li ser rewşa zarokên xwe û wiha got: "Em sala 1994'an ji ber zilma dewleta Tirk neçarî penaberiyê bûn û niha li Wargeha Penaberan a Mexmûr ne. Her du  zarokên min piştî dibistan xilas kirin, ji bo ku kar bikin berê xwe dan Swîsreyê û li wê derê serlêdana penaberiyê kirin, lê ji bo bên dersînorkirin hatin girtin. Parêzerê ku doza wan dişopîne jî nêzî dewleta Tirk e û ji wan re gotine ku 'hûn ne hemwelatiyên Wargeha Mexmûrê, em ê we radestî dewleta Tirk bikin'."

Talli bang li Kurdistaniyan û saziyên mafên mirovan kir ku ji bo wan bibin alikar û nehêlin zarokên wan radestî dewleta Tirk bikin.

Birayê her du penaberan Hamît Talli jî bang li Neteweyên Yekbuyî û saziyên mafên mirovan kir ku li erk û berpirsyartiyên xwe xwedî derbikevin.