Avahiya li navenda bajarê Dersimê ku di salên 1935 û 1937'an de weke leşkergehê hate avakirin û heta sala 1949'an hate bikaranîn, veguherandin "Muzeya Tûncelî". Ji bo vê leşkergeha ku weke cihê birêvebirina Qirkirina Dersimê û cihê êşkenceyê tê naskirin, rêxistinên civakî yên sivîl dixwestin ku bibe navend bîrê.

'NAVÊ OPERASYONÊ LI MUZEYÊ HATE KIRIN'

Navenda Lêkolînên Dersimê bi daxuyaniyekê ragihand ku li gel pêniyarên saziyan û komeleyan jî Muzeya Tûncelî hate vekirin. Di daxuyaniyê de hate gotin, "Ev cih xwedî girîngiyeke dîrokî ye. Cihê birêvebirina komkujiyê ye. Aliyekî xwe yê bi vî rengî giran û bi êş heye. Me xwest ku ev der weke navenda bîrê bimîne. Em dibînin ku daxwaza me qebûl nekirine. Lêkirina navê Muzeya Tûncelî nîşan dide ku zîhniyeta wê demê dewam dike."