Li gundê Xelef ê Şengalê danê nîvro Rêveberiya Xweser û Demokratîk ya Şengalê ji bo piştgiriya berxwedana Rojavayê Kurdistanê ya li dijî êrişên qirkirinê yên dewleta Tirk û şîrîkên wê, çalakiyeke du rojî ya konvedanê destpêkirin.

Xelkê Êzidî û Ereb yên Şengalê, nûnerên partî, rêxistin, sazî û dezgehên Şengalê ji bo piştgirîdayîna berxwedana gelê Rojava û hemû gelên din yên li Bakur û Rojhilatê Sûriyeyê ya dijî êrişên qirkirinê, bi vedana kon re serdana kon kirin û berxwedana gelên Bakur û Rojhilatê silav kirin.

Di roja yekemîn a çalakiyê de peyamên ji bo piştgiriya berxwedana Bakur û Rojhilatê Sûriyeyê ya dijî dagirkerî û êrişên qirkirinê hate dayîn. Beriya peyamên piştgiriyê çalakî bi deqîqeyek rêzgirtin ji şehîdên Bakur û Rojhilatê Sûriyeyê yên di van êrişên dawiyê de şehîd bûne re destpê kir.

Di destpêkê de Hevserokê Desteya Rêveber a Şengalê Xwedêda Elyas axivî û wiha got: “Li Rojava dewleta Tirk a dagîrker bê navber êrişên xwe dewam dike. Ji bo gel bidin koçkirin bi taybet çavkaniyên wan yên jiyanê hedef dikin û vêya jî li pêş çavê hemû cîhanê dikin. Lê heya niha herkes li beramber van kiryarên dewleta Tirk ên dijî Rojava bêdengin. Di van êrişa de  ji bo gel koçber bike  cihên ku gel liser wan jiyan dike  dike hedef. Ev yek li ber çavê tevahiya cîhanê têkirin û her kes lihimber kiriyarên dewleta Tirk liser Rojava bêdenge.”

Elyas diyar kir, li kuderê gel xwe rêve bibe û bibe xwedî îrade, dewleta Tirk êrişê wir dike û wiha pê de çû: “Şengal bi hemû pêkhateyên xwe ve, amadeye ji bo piştgiriya Şengalê. Her wiha em bang li saziyên mafê mirovan jî dikîn ku erka xwe bicîh bînin.”

Li ser navê Tevgera Azadiya Jinên Êzidî (TAJÊ) Nefiya Mêşo jî di konê piştgiriyê de axivî û wiha anî ziman: “Em ji bo piştgiriya Rojava li vir kombûne, ji ber em xwe deyndarê xelkê Rojava dibinin. Rêveberiya Rojava û gelê wê bi hemû derfetên xwe herdem buye piştevan ji gelên azadîxwaz re. Xelkê Rojava tenê dixwaze bi azadî li ser axa xwe bijî, daxwaza tiştekî ji ti kesî nake. Em ji xelkê Rojava re dibêjin, hun ne bi tenêne, heya em hene emê piştevaniya we bikin. Emê bihevre vê dozê bibin serî.’

Li ser navê Meclisên herêma Erebên Şengalê jî Xideyer Saleh diyar kir ku dewleta Tirk êrişê ew hêzên ku mirovahiyê ji DAIŞ’ê parastin dike û wiha axivî: “Kesên hatine hedef girtin û şehîdbûne, ji bo parastina gelên Bakur û Rojhilatê Sûriyeyê gelek ked dane. Ji bêdengiya heyî ya beramber van êrişan fêm dikin ku ev êrişeke hevbeşe. Çawa Iraq li beramber êrişên dewleta Tirk ên dijî Şengalê bêdenge, hikûmeta Şamê jî li Sûriyeyê beramber van êrişan bêdeng e. Armanca van dewletan ewe ku biratiya nava gelan de ji holê rake. Armanca van êrişan, ji hev dûrxistina gelên herêmê û belavkirina wê ye.”

Konê çalakiyê bi serdanên ji her devera Şengalê ve dewam dike.