Îro saet di heştê sibehê de navendên dengdanê ji bo Hilbijartinên Encumenên Parêzgehên Iraqê ji dengderan re vebûn. Xelkê Kerkûka başûrê Kurdistanê bi cil û bergên Kurdî diçin navendên dengdanê û bi coşeke mezin dengên xwe bi kar tînin.

Hilbijartinên encumenên parêzgehan piştî 18 salan yekem car e ku li Kerkûkê tên kirin ûli bajarê Kerkûkê mafê dengdanê yê mîlyonek û 153 hezar kesan heye, lê belê 868 hezar û 901 kes xwedî karta elektronîk in û dikarin deng bidin.

Hunermendê ji bajarê Kerkûkê Umere Dirêj li ser beşdarbûn û girîngiya hilbijartinê ji ANF’ê re axivî û got: “Ez ev qas dibêjim, Kurdino, merdino, em destê xwe bidin hev. Bijî Kerkûk, bijî Kurdên Kerkûkê û hemû Kurdên dilsoz. Ez hêvî dikim hemû Kurd biçin ser sindoqên dengdanê û dengên xwe bidin. Kesekî 111 salî hatiye ku dengê xwe bide. Pêwîst e ciwan jî werin û dengên xwe bidin. Ji ber ku îro rojeke çarenûssaz e ji bo me.”

Bitementirîn hilbijêrê Kurd Mela Behadîn ku 111 sal temenê wî heye, beşdarî dengdana îro bû û helbesta Hêmin Mukiryanî ya “Ez Kurd im” xwend. Mela Behadîn bi rêya ANF’ê bang li hemû Kurdan kir ku beşdarî hilbijartinê bibin û got: “Şerm e ku xelk neyên û beşdarî hilbijartinê nebin. Şermeke mezin e ji bo her Kurdekî ku îro dengê xwe nede.”

Jina bi navê Kurdistan Azad ku jineke astengdara fîzîkî ye, hat û dengê xwe da û peyamek arasteyî Kurdên Kerkûkê kir û ragihand: “Ez daxwazê ji hemû kesan dikim ku bila bi moraleke mezin werin û dengên xwe bidin.”

Hêjayî gotinê ye ku li seranserî Iraqê 15 mîlyon û 108 hezar û 135 kes xwedî mafê dengdanê ne û dikarin li 42 hezar û 666 navendan dengên xwe bidin.