Dewleta Tirk a dagirker duh bi bombebarankirina gundê Perex ê Zaxoyê komkujiyek pêk anî. Di bombeberana komkujker de 9 kesan jiyana xwe ji dest dan û 23 kes jî birîndar bûn ku rewşa gelek ji wan giran e.

Rêxistina Partiya Demokratîk a Gelan (HDP) ya Şirnexê bi daxuyaniyekê bertek nîşanî êrîşa dewleta Tirk a dagirker da. Daxuyanî li ber avahiya HDP’ê ya navçeya Silopiyê hat dayin. Rêxistinên HDP’ê yên navçeyê, Meclîsa Dayikên Aştiyê û parlementerên HDP’ê yên Şirnexê tevlî daxuyaniyê bûn. Çalakvanan pankarta li ser hatibû nivîsandin, “Em komkujiya li Zaxoyê ya Başûre Kurdistanê şermerezar dikin” vekirin.

Daxuyanî ji aliyê Hevserokê Rêxistina HDP’ê ya Şirnexê Abdullah Gungen ve hate xwendin. Gungen destpêkê êrîşa komkujiyê ya li Zaxoyê şermezar kir û wiha axivî: “Ev êrîş bi temamî li dijî gelê sivîl pêk hatiye, lewma jî banga me li partî, sazî û dezgehên Kurdî ev e ku bi yek dilî, yek dengî û bi awayekî tund li dijî vê êrîşê bertekê nîşan bidin û bi awayekî lezgîn li dijî hebûna leşkerî ya dewleta Tirk ya li Herêma Kurdistanê bertek nîşan bidin, helwesta xwe diyar bikin.”

Abdullah Gungen, wiha dawî li axaftina xwe anî: “Em bang li raya giştî ya navneteweyî, Yekîtiya Ewropayê, Neteweyên Yekbûyî û Rêxistina Şopandina Mafên Mirovan û hemû gelên Tirkiyeyê, rêxistinên sivîl û partiyên siyasî dikin ku li dijî van êrişan dengê xwe bilind bikin û nebin şirîkê van komkujiyan.”