Li gorî nûçeya malpera Nûçe Ciwan, komek ji xwendekaran bi daxuyaniyekê ragihandin ku ew beşdarî nava refên gerîla bûne.

Xwendekaran bang li çalakgerên Rojhilatê Kurdistanê û Îranê kirin ku têkoşîna xwe xurt bikin û li rêya çareseriya demokratîk bigerin.

Her wiha bang li jin ên ciwan û ciwanan hemûyan jî kirin ku berê xwe bidin nava refên gerîla û li ber dagirkeriyê rabin.

Daxuyanî wiha ye:

"Em komek ciwan û jinên Rojhilatî, ji Zanîngeha Sine, bi pêşketina şoreşa azadiya jinê ya ku li Rojhilat û Îranê destpê kir, ji bo li dijî her cure zilmê li ber xwe bidin, tevlî nava refên gerîla bûne. Berxwedan û têkoşîna rewa ya gelê Kurd û gelên Îranê li hember zilma 44 salan a rejîma xwînmij û baviksalarî ya Îranê gihiştiye qonaxa dawî.

Bi qetilkirina jina Kurd Jîna Emînî re agirê nefreta hemû gelan ji nû ve hate pêxistin. Bê guman ev gaveke zêrîn e ji bo yekgirtina daxwazên me yên rewa û xwe birêxistinkirin ji bo gihandina asoyeke geştir. Di vê rewşê de beşên civakê yên herî bindest jin û ciwan bi tifaqeke dîrokî stûnên desthilatdariyê dişkînin û bingeha jiyana azad datînin.

Rewşa heyî di dirûşmeya Jin, Jiyan, Azadî de xwe dide der. Mizgîniya yekîtî û serketina hêzên rizgariya gelan li hemberî hêzên kevneperest ên herêmê ye, ku ferhengoka wan jinan weke kole, jiyana şaş û ji azadiyê bêpar dibîne ye. Ji ber vê yekê dewletên Îran û Tirkiyeyê li ser navê hemû kevneperestan dest bi êrîşên dawî kirin û bi awayekî hovane êrîşî gel û gerîla kirin.

Em weke jinên ciwan û ciwan bang li jin û ciwanên Kurd, Fars, Azerî, Belûç, Ereb û Gîlak dikin ku tola dîrokî ji dagirkeran hilînin û şoreşa azadiya jinê bi ser bixînin. Werin em kîna xwe ya neteweyî û çînayetî bi rêxistin bikin û zêdetir bibin. Werin em qadên şer bi vî rengî berfireh bikin. Ji bo parastin û domandina şoreşê li kolanan, divê em qada şer li çiyayan berfireh bikin û hêza gerîla weke hêza rêxistinkirina jin û ciwanan bi hêztir bikin."