Kongreya Civaka Demokratîk (KCD), bi wesîleya 4'ê Nîsanê rojbûna Rêberê Gelê Kurd Abdullah Ocalan daxuyaniyeke nivîskî weşand.

Di daxuyaniyê de hat gotin, "Li Rojhilata Navîn, Tirkiye û Kurdistanê em di pêvajoyeke dîrokî û girîng de ne. Di van rojên dîrokî de pêvajoyeke hem zilm, komkujî, tinehesibandin, pişaftin û gengeşî derketiye asta herî bilind û hem jî ligel vê neyîniyê ruh û pratîka hêvî, berxwedan û têkoşînê zêde bûye."

KCD'ê bibîr xist, gelên Kurdistanê û Rojhilata Navîn, Ocalan weke rêberê xwe qebûl kirine û diyar kir, ew ê rojbûna 68. a Rêberê Gelê Kurd bi hemû gelan re li her derê û li gundê Amarayê bi hêvî, berxwedan û têkoşîneke bêhempa pîroz bikin.

KCD'ê destnîşan kir, ku Ocalan ê bûye hêviya aştiyê ev 18 sal in li Girtîgeha Îmraliyê bi tena serê xwe tê girtin û ragihand, ev pêkanînan ku mînaka wê li ti devera dinyayê tine ye li sîstema Girtîgeha Îmraliyê bi awayekî herî dijwar tê meşandin.

Di dawiya peyamê de wiha hat gotin: "Birêz Ocalan ligel vê tecrîda girankirî ya ku li ti devera dinyayê mînaka wê tine ye bûye hêvî, berxwedan û têkoşîna gelan û em radigihînin ku azadî, ewlehî û tenduristiya birêz Ocalan bûye sedema jiyana hemû gelan. 

Rojbûna birêz Ocalan bûye destpêka hebûn, têkoşîn û rojbûna gelê kurd û ji bo gelê kurd mîladek e.

4'ê Nîsanê rojbûna birêz Ocalan ê bûye mîmarê hêviya aştî, biratî û demorasiyê gelan û ev hişmendiya wî ji hêla dinyayê ve hatiye qebûlkirin.

Em bang li her kesî dikin ku ji bo pîrozbahiyê roja 4’ê Nîsan li cih û warê ku roja me lê hilat û bûye qada berxwedanê li gundê Amarayê bi hev re govenda azadiyê bigerînin."