KCD'ê daxuyaniya Barzanî ya li ser Qendîlê weke daxuyaniyeke bêtalihî bi nav kir û got, "Daxuyaniyên bi vî rengî zirarê dide Yekîtiya Neteweyî ya gelê Kurd, cesaretê dide êrîşên dagirkeriyê û wan rewa nîşan dide."
Kongreya Civaka Demokratîk (KCD) bi daxuyaniyeke nivîskî ragihand ku 2 salên dawî ji bo azadiya gelê Kurd bi têkoşîn û tecrûbeyên têr û tijî derbas bû.
KCD'ê polîtîkayên êrîşkarî, faşîst û nîjadperestî yên piştî referandûma Başûrê Kurdistanê bi serkêşiya Tirkiyeyê hatin kirin bi bîr xist û diyar kir ku Kerkûk di encama vê polîtîkayê de ji dest çû.
KCD'ê da xuyakirin ku dagirkirina Efrînê ji hêla artêşa Tirk ve dewama vê pêvajoyê ye û işaret bi gefên êrîşkariyê yên li Minbic û herêmên din tên xwarin kir.
Di daxuyaniyê de hate ragihandin ku ji ber van polîtîkayên dagirkeriyê yên dewleta Tirk, li Efrîn, Kerkûk û bajarên din ên Rojava û Başûrê Kurdistanê hewl tê dayin ku demografiya herêmê bê guhertin.
KCD'ê destnîşan kir ku ji ber van bûyer û êrîşan, gelê Kurd li hemû beşên Kurdistanê ji aliyê civakî, siyasî û demografîk ve di rewşeke xetere de ye û wiha dewam kir:
"Çareserkirina van pirsgirêkan bi yekîtiya neteweyî dibe. Ev yek di daxuyaniyên hemû partiyên siyasî û saziyên Kurdistanî de bi gelê me re hatiye parvekirin."
KCD'ê işaret bi daxuyaniya Serokwezîrê Herêma Kurdistanê Nêçirvan Barzanî yên li ser Qendîlê kir û diyar kir ku vê daxuyaniyê nîşan daye ku Barzanî tecrûbeyên berê rast nenirxandiye û siyaseta Yekîtiya Neteweyî fêhm nekiriye.
KCD'ê daxuyaniya Barzanî ya li ser Qendîlê weke daxuyaniyeke bêtalihî bi nav kir û got, "Daxuyaniyên bi vî rengî zirarê dide Yekîtiya Neteweyî ya gelê Kurd, cesaretê dide êrîşên dagirkeriyê û wan rewa nîşan dide."
Di dawiya daxuyaniyê de bang li hemû lîder û rêveberên partiyên siyasî hate kirin ku xwe ji daxuyaniyên zerarê digihînin Yekîtiya Neteweyî û rê li ber dagirkeriyê vedikin vegirin.
