17’ê Cotmehê li gundê Kanî Kendî yê ser bi navçeya Koye ya Hewlêrê, wesayîta malbatek ji wargeha penaberan a Mexmûrê, ji aliyê balafirek bêmirov û biçek a dewleta Tirk a dagirker ve hatibû bombebarankirin û ciwanê bi navê Dilovan Îşlek şehîd bibû.

5 karkerên ji Wargeha Mexmûrê ku xwestin di heman rojê de ji Bexdayê biçin pêşiya karwanê cenazeyê Dilovan Îşlek, li nuqteya kontrolê ya Bîrebas a PDK’ê ya Hewlêrê hatin binçavkirin û ew birin Asayişa Hewlêrê.

Ji vê rojê ve tu agahî 5 karkerên bi navê Zagros Atalay, Mihemed Nûrî Avci, Mihemed Şirîn Avci, Ehmed Baytaş û Bêwar Baytaş nayê girtin.

Malbatên kakeran ji bo agahiyê wan bigirin çûn nuqteya kontrolê ya Bîrebasê û aqûbeta zarokên xwe ji hêzên PDK’ê pirsîn. Hêzên PDK’ê destpêkê binçavkirina wan qebûl nekirin. Li ser israra malbatan li xwe mikur hatin ku 5 karker ji hêla wan ve hatine binçavkirin û ew birine Asayişa Hewlêrê. Malbat ligel hemû hewldanan jî derbarê rewşa wan de agahî wernegirtin û ji jiyana zarokên xwe bi fikarin.

Berê jî du şêniyên ji Wargeha Mexmûrê ji aliyê PDK’ê ve hatibûn girtin û bi awayekî guman jiyana xwe ji dest dabûn.