Li gorî daxuyaniya ji aliyê HPG’ê ve hate dayîn, Li Colemêrgê 6, li Wanê kontrayek, li Amedê 1 jê serdar 3 leşker hatin kuştin. Li Çewligê jî li dijî qereqolê çalakiyek hate kirin.

Daxuyaniya HPG’ê ya li ser malpera fermî parvekirî wiha ye:

LI ŞEMZÎNAN 6 LEŞKER HATIN KUŞTIN

Hêzên me di çarçoveya Pêngava Şoreşgerî ya Şehîd Bedran Gundikremo û Şehîd Nalîn Mûş de, 2’yê Tebaxê saet 15:00’an, li dijî girên ewlekariyê yên Qereqola Bêzelê ya girêdayî navçeya Şemzînan a Colemêrgê çalakiyek lidar xistin. Girên ewlekariya qereqolê ji çar baskan ve hatin lêxistin, di vê çalakiyê de bi qasî hate zelalkirin 6 leşkerên Tirk hatine kuştin. Artêşa Tirk piştî çalakiyê bi obus û hewanan qad bombe kirin, saet 19:30’an jî bi alîkariya helîkopterên Skorsk kuştî û birîndarên xwe ji gir rakirin.

LI WANÊ KONTRAYEK HATE KUŞTIN

2’yê Tebaxê saet 12:00’ê hêzên me li devera Guzeldere ya girêdayî Wanê yekîneyekî kontra xistin di bin kontrola xwe de, heman rojê saet 15:00’an li dijî yekîneya ku hatibû hedefkirin çalakiyek hate lidarxistin. Di vê çalakiya ji nêz ve li kontrayan hate xistin de, bi qasî hate zelalkirin kontrayek hate kuştin, 2 kontra jî hatin birîndarkirin.

LI AMEDÊ SERDAREK Û 2 LEŞKER HATIN KUŞTIN

1’ê Tebaxê saet 05:30’an, artêşa Tirk a dagirker li derdorî Gundê Xoser a girêdayî navçeya Lîcê ya Amedê dest bi operasyonekê kiribû. Hêzên dagirker ên Tirk ên ku ketin gundê Xoser zext û zilm li gundiya kirin, êşkence li welatiyan kirin.

1’ê Tebaxê saet 09:40’an hêzên me, li dijî koordîneya operasyonê ya li qontarên girê leşkeran çalakiyek lidar xistin. Di vê çalakiyê de serdareke ku koordîneya operasyonê bi rêve dibir, li gel 2 leşkeran hate kuştin. Artêşa Tirk a ku di operasyonê de derbên giran xwarin, heman rojê saet 15:30’an bê ku encamek bi dest bixin vekişiya.

LI ÇEWLIGÊ LI DIJÎ QEREQOLÊ ÇALAKÎ

Hêzên me di çarçoveya Pêngava Şehîd Azad Farqîn û Şehîd Jînda Ozgur de, 1’ê Tebaxê saet 23:00 li dijî Qerqola Şargê ya girêdayî Çewligê çalakiyek lidar xistin. Di vê çalakiya avahiya qereqol û çeper hatin hedefkirin de, têkildarî hejmara kuştî û birîndarê leşkeran agahiyên zelal nehatin bidestxistin. Piştî çalakiyê 2’yê Tebaxê artêşa Tirk a dagirker li herêmên Şargê, Karavelyan û Sancakê dest bi operasyonekê kirine. Heman rojê operasyona ku bê ku encamekê bigire vekişiya, hêzên dagirker bi obus û hewanan Girê Şargê bobmberdûman kiriye. Ji ber bomberdûmanê şewata ku derketî hê jî dewma dike.