HPG'ê nasnameya 2 gerîlayên li qada Qaşûrayê şehîd bûn eşkere kir û got, "Hevrêyên me Baxtiyar û Xebat bûn milîtanên bi mînak ên Gerîlatiya Modernîteya Demokratîk. Di têkoşîna xwe de em ê her tim xwedî li bîranîna wan derkevin."
Daxuyaniya Navenda Ragihandin û Çapemeniyê ya HPG'ê wiha ye:
"24'ê Cotmeha 2021'ê li qada Qaşûra ya Metînayê, hevrêyên me Baxtiyar û Xebat ku bi erka xwe radibûn, di encama bombardûmana dewleta Tirk a dagirker de şehîd bûn. Hevrêyên me Bextiyar û Xebat ku di vê pêvajoya dîrokî de hay ji berpirsyarî û wezîfeyên xwe bûn û li gorî vê têgihiştinê tevlî dibûn, bûn milîtanên bi mînak ên Gerîlatiya Modernîteya Demokratîk. Di nava têkoşîna xwe de em ê her tim xwedî li bîranîna wan derkevin.
Agahiyên li ser nasnameya hevrêyên me yên şehîd bûne wiha ne:
 |
Nasnav: Baxtiyar Dijwar |
 |
Nasnav: Xebat Hîmo |
BAXTIYAR DIJWAR
Hevrêyê me Bextiyar li gundê Hespistê yê welatparêz ê Hezexê li nava malbatekê ji dayik bû ku di Têkoşîna Azadiyê ya Kurdistanê de nirx afirand. Ji ber welatparêziya gundê Hespistê û dilsoziya bi Têkoşîna Azadiyê ya Kurdistanê re, her wiha ji ber ku ji nava malbata xwe gelek şehîd hebûn, hevrêyê me Bextiyar bi sempatî nêzî partiya me PKK'ê bû. Ev sempatî bi demê re kir dilsoziya bi zanebûn û sala 2013'an ku kelecan û têkoşîna şoreşa azadiyê li tevahiya Kurdistanê hebû tevlî nava refên gerîla bû. Di doza azadiyê ya gelê me de hewl da erk û berpirsyariyên xwe bi cih bîne.
Hevrêyê me Bextiyar pê hesiya ku jiyana gerîla şêweyê jiyaneke pîroz e ku bi ked û berdêlên giran hatiye avakirin. Ji bo hêjayî vê jiyanê bibe bi coş û daxwazeke mezin tevlî bû û di demeke kurt de veguherî gerîlayekî şareza. Di pêşketina xwe de ti sînor nas nekir, timî hewl da tiştên nû hîn bibe. Ji ber van taybetmendiyên xwe hevrêyê me Baxtiyar li ser her kêliya jiyana gerîla serwer bû û di asta pêşengiyê de bû fermandar. Bi asteke jiyanî nêzî perwerdeyên pisporiya Gerîlatiya Modernîteya Demokratîk bû û bû gerîlayekî profesyonel. Di heman demê de milîtanekî wezîfeyê bû û li her devera ku pêwîstî pê hebû li wir bû. Bi saya van taybetmendiyan tevlî gelek karên krîtîk bû, baweriya hevrêyên xwe ya bi xwe bi cih anî. Bi kedkarî, fedakarî, tevlîbûna xwe ya cewherî û hevrêtiya xwe, di nava hevrêyên xwe de bû cihê hezkirin û hurmetê. Hevrêyê me Baxtiyar wê her tim weke pêşengekî hevrêyên xwe be.
XEBAT HÎMO
Hevrêyê me Xebat li Qamişloyê li gundê Hîmo ji dayik bû ku vî gundî bi dehan ewladên xwe yên hêja da Têkoşîna Azadiyê ya Kurdistanê. Ji ber welatparêziya derdora xwe û kelecana şoreşê ya di demên destpêkê yên Şoreşa Rojava de hevrêyê me Xebat gelekî bi bandor bû. Ji bo Rêber Apo yê ku kelecaneke bi vî rengî da gelê me yê li Rojava û gerîlayên azadiyê ji nêz ve nas bike, sala 2011'an biryar da ku tevlî nava refên gerîla bibe.
Hevrêyê me Xebat bi kesayetiya xwe ya cewherî bû cihê rêzê li nava hevrêyên xwe û di demeke kurt de hînî jiyana çiyê û gerîla bû, li cewhera xwe vegeriya. Jiyana gerîla xwe jinûve vejînê pênase kir û bi vê jiyana nû re bû yek. Hevrêyê me Xebat weke gerîlayekî Kurdistanê li herêmên cuda yên welatê me karê gerîlatiyê kir. Hingî Şoreşa Rojava pêk hat û di pêvajoya vê şoreşê de bi sedan ewladên leheng ên gelê me şehîd bûn. Yek ji van lehengan jî birayê hevrêyê me Xebat bû. Ji bo tola birayê xwe hilîne ku ji bo siberoja azad a gelên me şehîd bû û ji bo hêjayî hevrêyên şehîd bibe, biryar da ku tevlîbûneke hîn xurt bike. Xwe li her qadê perwerde kir û bû milîtanekî bi mînak ê Apoyî. Bi berpirsyariya pêvajoyê baweriya xwe bi wê yekê anî ku divê hîn bêhtir bikeve bin bar. Ev jî bi fermandariyê dibû, wî jî xwe ji wezîfeya pêşengiyê venegirt. Hevrêyê me Xebat li herêma Metînayê bi tevlîbûna xwe ya kedkar û durust gelek karên girîng bi ser xist û tevlî nava karwanê şehîdan bû.
Xelkên me yên Şirnex û Qamişloyê ku bi hezaran ewladên xwe yên leheng ji bo azadiya Kurdistanê bêteredût feda kirin, wezîfeyên xwe yên welatparêziyê di vê pêvajoyê de jî bi cih anîn û hevrêyên me Baxtiyar û Xebat şand nava refên azadiyê. Hevrêyên me Baxtiyar û Xebat ji bo armanca 'Rêberê Azad, Kurdistana Azad' ku gelê me ji wan hêvî dikir, şer kirin û şehîd bûn. Em sersaxiyê ji malbatên hêja yên hevrêyên me Baxtiyar û Xebat re û tevhiya gelê me yê Kurdistanê yê welatparêz re dixwazin."
