Meşa bi şîara “Gelê Başûr ji bo piştgiriya Efrînê dimeşe” ku di bin pêşengtiya Kongreya Netewî ya Kurdistanê (KNK) de hemwext li 7 navendên cuda yên Başûrê Kurdistanê dest pê kir.

Bi deh hezaran kes beşdarî meşê bûne û Berxwedana Serdemê silav dikin, dewleta Tirk a dagirker protesto dikin.

Rêxistinên civaka sivîl, nûnerên partiyên siyasî, rûspiyên herêmê, nivîskar, akademîsyen û hunermend jî beşdarî meşê bûn.

Gel beriya meşê li Caddeya Seholekeyê li hev civiyan û govend gerandin, ji bo Efrînê dirûşme qîrkirin. Di heman saetê de li Hewlêrê jî gel kom bûn û nerazîbûneke mezin li dijî êrîşên dagirkeriyê yên dewleta Tirk nîşan dan.

Di meşê de wêneyên Rêberê Gelê Kurd Abdullah Ocalan, Barîn Kobanê, Avesta Xabûr û alên YPG/YPJ’ê hatin hildan. Di meşê de dirûşmeyên ‘Efrîn ne bi tenê ye’ û ‘Dîktator Erdogan’ hate qîrin.

Di serî de li Silêmanî û Hewlêr jî di nav de, li Ranya, Koyê , Derbendîxan meş seat 14:00’an dest pê dike, li Helebçeyê jî saet 14:30, li Kelar jî saet di 16:00’an de dest pê dike.

Li Silêmanî gel li Caddeya Seholeke heya Parka Baxê Giştî; li Hewlêr ji Parka Şanedar; li Ranya li ber Amadeyî ya Ranya; li Koyê li ber Parka Qereberaz meşê dest pê kir.

Li aliyê din ji bo meşa li Diyanayê ya ji bo Efrînê destûr nehate dayîn û meş îro pêk nehat.