Cenazeyê bavê Hevserokê Giştî yê Partiya Demokratîk a Gelan (HDP) ê berê Selahattîn Demîrtaş ê ji Doza Kobanê girtî, Tahîr Demîrtaş, ji bo ku wecîbeyên olî pêk bînin birin Goristana Yenîkoyê ya navçeya Rezan a Amedê. Demîrtaş ji ber rewşa “Dîl girtinê” ya heyî daxwaz nekir ku tevlî merasîma cenaze bibe. Siyasetmedar û hezkiriyên Demîrtaş di merasîma cenazeyî de malbata Demîrtaş bi tenê nehişt.

Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogûllari, parlamenterên DEM Partiyê Salîha Aydenîz, Serhat Eren, Adalet Kaya, Sevilay Çelenk, Rêxistina DEM Partiyê ya Amedê, Dayikên Aştiyê, Hevseroka DBP’ê ya Amedê Sûltan Yaray, siyasetmedarê Kurd Ahmet Turk, parêzerên Baroya Amedê, Serokê Şaxa ÎHD’a Amedê Ercan Yilmaz, parlamenterê CHP’ê Sezgîn Tanrikûlû, nûnerên saziyên sivîl ên civakî, rewşenbîr û nivîskar tevlî merasîma cenaze ya li Goristana Yenîkoyê bûn.

Cenazeyê Tahîr Demîrtaş, piştî nimêja cenaze ya li Goristana Yenîkoyê hate kirin, ji bo veşartinê birin Goristana Mardînkapi ya li navçeya Bajarênû ya Amedê. Li ser gora Demîrtaş ê li vir hate veşartin bi zaravayê kirmanckî yê Kurdî ku zimanê dayika Demîrtaş e dûa hatin kirin.

Pişt re ji bo şînê derbasî Mala Şînê ya Licêyiyan bûn.