Bi sedan welatiyên bajarê Hesekê li pêşiya Saziya Malbatên Şehîdan a bajêr kom bûn, cenazeyê şervanên YPG’ê Îmad Mesûd Îbrahîm (Şerîf Şiyar) ê ku di Pêngava Xezeba Firatê de jiyana xwe ji dest dabû wergirtin û ber bi Goristana Şehîd Dijwar a li gundê Dawidiyê ve ketin rê.

Li goristanê merasîmekî leşkerî hate lidarxisin. Piştre Fermandara YPG/YPJ′ê Mihabad Koçer axivî, sersaxî ji malbata têkoşer re xwest û got ku hêzên wan rûberên fireh ji çeteyên DAIŞ′ê rizgar kirine. Mihabad wiha got: ″Hêzên me bajarê Reqayê dorpêç kirine û azadî nêze.″

Endama Meclîsa Malbatên Şehîdan Fatma Hesen anî ziman ku şervanên QSD′ê ji bo rizgarkirina gelê xwe, berxwedaneke bêhempa didin meşandin û wiha got: ″QSD′ê tekane hêza ku parastina hemû pêkhateyên herêmê yên Kurd, Ereb û Suryan dike ye.″

Her wiha Endamê TEV-DEM′ê Ferhan Dawûd jî êrîşên PDK′ê yên li ser Şengalê şermezar kir û diyar kir ku armanca vê yekê derxsitina tevlîheviyan a di navbera gelên herêmê de ye.″

Piştî axaftinan, nasnameya têkoşer hat xwendin, radestî malbatê hate kirin.

 Di dawiya merasîmê de cenazeyî Şerîf Şiyar hate veşartin.