Serokwezîrê Herêma Kurdistanê Neçîrvan Barzanî piştî civîna desteya wezîran daxuyaniyek da çapemeniyê.

Barzanî qala çalakiyên kedkaran kir ên ku ev 4 roj in li Başûrê Kurdistanê li qadan in kir û wiha got; “Em xwepêşandanên karmendan rewa û mafdar dibînin. Lê belê ne tiştekî rast e ku hin aliyên siyasî vî tiştî li gorî berjewendiyên xwe bi kar bînin. Hikûmeta me bi teqez wê destûrê nede kesên ku dixwazin kaos û aloziyê derbixînin.”

KOMKUJÎ NEDÎT ÊRÎŞ WEKE REWA NÎŞAN DA!

Barzanî hewldanên dagirkeriya dewleta Tirk a li Başûrê Kurdistanê û di êrîşên hewayî de qetilkirina sivîlan ji nedîtî ve hat û got ku sedemên Tirkiyeyê hene.

Barzanî wiha domand; “Ji bo li welatên cîran were xistin em qebûl nakin ku xaka Kurdistana Iraqê were bikaranîn. Ev ji bo Tirkiye, Îran, Sûriye û hemû aliyan lê ye. Me gelek caran ev ji PKK’ê re got. Me ji PKK’ê re gotiye ku em qebûl nakin hûn axa Başûrê Kurdistanê bi kar bînin û biçin li Tirkiyeyê çalakiyan li dar bixin.”