Rêber Apo ji bo azadiya gelê Kurd bi komeke biçûk dest bi rêwîtiya xwe kir. Fikrên ku parastina wê dikir bala her kesî dikişand. Hinek ditirsiyan, hinek ji wan jî meraqa wan li hemberî vê fikirê hebû. Hakî Karer yek ji wan hevrêyan bû ku ji roja destpêkê ve li cem Rêber Apo cih girt û pê re meşiya. Dema ku şehîd bû, Rêber Apo ji bo bîranîna wî PKK damezrand. Di 27'ê Mijdara 1978'an de li gundê Fîsê yê Amedê bi 22 kesan pêngaveke dîrokî hat avêtin û gelê Kurd partiyeke ku nêzî nîv sedsal e têkoşîna azadiyê dimeşîne bi dest xist û ew ê bi biryardarî biparêzin. Îro PKK'ê 46 sal qedand û gav avêt sala xwe ya 47'an.

Bi wesîleya salvegera damezrandina PKK'ê me fikrên gerîlayên HPG û YJA Starê wergirt.

HER KESÊ KU LI JIYANEKE AZAD DIGERE XWE DI NAVA PKK'Ê DE DIBÎNE

Endama TEV-ÇAND’ê gerîla Dersim, diyar kir ku ew ji ber salvegera Partiyê û agahîgirtina ji Rêber Apo gelek kêfxweş û kelecanî bûye û got, “Ewil em 27’ê Mijdadrê li Rêber Apo, hevalên di çaperên pêş de şer dikin, li gelên azadîxwaz û tevahiya gelê Kurd pîroz dikin. Ji ber silavê Rêber Apo em gelek kêfxweş in. Em jî silavên xwe rêdikin. Ez bi Şoreşa Rojava bandor bûm û beşdarî partiyê bû. PKK’ê ji bo min her tişt e. Çawa her tişt? Bawerî ye, hevrêtî ye, jiyan e. Ji ber ku PKK’ê baweriyê dide we, di nava PKK'ê de hûn dikarin her zor û zehmetiyê derbas bikin. Ev jiyaneke nû ye û di vê jiyanê de tu dikarî her tiştî bikî. Hûn kêlî bi kêlî li ber xwe didin. Em bawerî ji gelê xwe û Rêbertiya xwe hîn bûn. Rêbertî di demeke wiha de ku derfet nîn bûn, partî damezirand. Mirovekî ku tê gotin mirî ye, zindî kir. Nîşan da ku Kurd û jin hene. Dijmin her roj dixwaze gelê me tune bike. Dixwaze Rêbertiya me tune bike, têkiliyên wî yên bi me re bibire. Lê belê dijmin wê nikaribe bigihêje armanca xwe. Li pêşberî vê rastiya dijminane divê em PKK'ê û jiyana ku Rêber Apo ava kiriye biparêzin û divê em têkoşînê mezin bikin. PKK'ê nîşanî min da ku jinên Kurd dikarin çi bi dest bixin. Rêya jiyaneke rasteqîn, jiyaneke azad nîşan da. PKK’ê ne tenê partiya Kurdan e, her kesê li azadiyê digere dikare xwe di nava vê têkoşînê de bibîne. Ji ber ku felsefeya Rêber Apo her kesî hembêz dike."

‘PKK TEVÎ HEMÛ ÊRÎŞAN LI TEVAHIYA ENIYAN LI BER XWE DIDE’

Gerîla Zehredîn Zagros ê ji Rojavayê Kurdistanê tevlî nava refên gerîla bûye û bi salan e gerîlatî dike diyar kir ku ew weke endamê TEV ÇAND’ê xebatê dimeşîne. Zehredîn Zagros, anî ziman ku pênasekirina PKK’ê zehmet e û wiha domand, “PKK’ê çandek e, civakek e, nasnameyek e. PKK’ê pênaseya jiyaneke nû ye. Her tiştê PKK'ê li ser esasê nûbûnê ye. PKK’ê ji bo hemû gelan bûye çavkaniya hêviyê. Serhildana Jin Jiyan Azadî ya li Rojhilat derket holê, girîngiya peydakirina çareseriyê ji pirsgirêkên civakî re nîşan da. Rêbertiya me û PKK'ê bi paradîgmaya Modernîteya Demokratîk bi awayekî rast nêzî civakê dibe.

Hevrêyên me yên leheng ên li eniyan şer dikin, îro ruhê berxwedanê yê PKK'ê hildigirin. Ev ruh ruhê Hakî Karer, Sara, Kemal û Mazlûman e. Tevî hemû êrîşan jî tevgera me li hemû eniyan li ber xwe dide û roj bi roj çeperên xwe berfireh dike. Hevrê Rojger û Asya darbeyek xurt li dijmin xistin û çalakiyên Hevrê Rûken, Sara, Rojhat û Erdal ên beriya wan, îspat kirin ku PKK’ê ti carî nikare bê tinekirin. Rêbertî tevgereke wiha ava kiriye ku tinekirin ne pêkan e. PKK tinebûnê qebûl nake. Serketin nêz e û em bi biryar in ku vê bikin. Azadiya fîzîkî ya Rêber Apo jî nêz e. Banga min li hemû ciwanan e; Werin tevlî nava refên azadiyê bibin. Werin em hemû bi hev re govenda azadiyê bileyîzin."

DIJMIN NIKARE HÊVIYA ME TUNE BIKE

Endamê TEV-ÇAND’ê yê herî ciwan gerîla Tolhildan Hesekê, derbarê salvegera 27’ê Mijdarê de ev tişt gotin, “Divê dijmin baş bizanibe ku heta dilopa dawî ya xwîna xwe em ê dest ji vê têkoşîn û berxwedanê bernedin. Ji ber ku em hêzên parastinê yên gelê xwe ne. Dijmin bixwaze gelê me û gerîlayên wan tune bike jî, em her roj mezin dibin û xurt dibin. Em li dora Rêbertî xelekek ji agir in. Ev agir roj bi roj mezintir dibe. Kes nikare vî agirî bitefîne. Em bi îdîa û biryardar in, azadî pir nêz e. Ev pêvajo gelekî girîng e. Banga min li gel û ciwanên Kurdistanê; Li hemberî dijmin stûyê xwe xwar nekin. Divê ciwan bi taybetî berxwedana xwe ya li dijî faşîzmê nesekinînin. 27'ê Mijdarê ji bo gelê Kurdistanê rojeke pîroz e. PKK’ê weke komeke biçûk dest pê kir, lê îro bi mîlyonan hevrêyî dewam dike. Ev dijmin nikare moral û hêviya me tune bike. Em her tim li cem Rêbertiya xwe ne û ez bawerim ku em ê îsal bi Rêbertiya xwe re bijîn."

GELÊ KURDISTANÊ GELEKÎ ZANE YE

Gerîla Armanc Arî ji Rojhilatê Kurdistanê ye û bi salan e hem weke hunermendekî hem jî weke şoreşgerekî têdikoşe. Armanc Arî, diyar kir ku 27'ê Mijdarê ji bo gelê Kurd dîrokeke gelekî girîng e û wiha got, “Bila salvegera 47'an a PKK'ê ji bo gelê Kurdistanê bibe sala serketinê. PKK’ê salên dirêj e li dijî hêzên mêtînger û faşîst têdikoşe. Gelê Kurd nikare bêparastin, bê fikir û bê siyaset be. Bi saya PKK’ê gelê Kurdistanê bû xwedî hişmendiyeke polîtîk. Civakeke welê ava kir ku li dijî dagirkerî û êrîşan têkoşiya û sekinî. Ev rûmeteke mezin e. Salvegera 47'an a PKK'ê pîroz dikim. Li çiyayên Kurdistanê gerîla berxwedaneke mezin raber dike û gelê Kurdistanê jî vê berxwedanê bi coşeke mezin pêşwazî dike.

Sekna gelê Kurdistanê ya li dijî dijmin zelal e. Lê divê di vê pêvajoyê de hevgirtin bê xurtkirin. Di vê pêvajoyê de li Rojhilata Navîn tevlîheviyeke mezin heye. Gel tê qetilkirin, dixwazin tune bikin. Dîrok ji nedîtî ve tê. Weke Kurd divê em di ferqa vê rastiyê de bin. PKK'ê di têkoşîna xwe ya 47 salan de pêşengên xwe yên mezin şehîd daye û hê jî şehîd dikeve. Ev mîrate gelekî hêja ye. Gerîla her tim ji bo azadiya jin û civakê têdikoşe. Divê ev têkoşîn tenê li çiyayan nemîne, divê ji gundan heta bajaran û li hemû malên Kurdan belav bibe. Eger gelê me baş bi rêxistin bibe û xwe bi rê ve bibe, serketin wê ya me be. Eger îro li tevahiya cîhanê nav û hebûna Kurdistanê tê zanîn, ev bi saya fikrên PKK’ê û Rêber Apo ye."