Endamê Komîteya Navendî ya PKK'ê Cemal Şerîk, salvegera 40'î ya damezrandina PKK'ê nirxand. Şerîk got, hêzên ku digotin 'Êdî wê kes nema karibe navê PKK'ê hilîne, PKK wê nemîne' bi van gotinan xwestine, tinebûna xwe veşêrin.

Şerîk bi bîr xist, nêzî nîv sed sal e ku PKK ji bo azadiyê têdikoşe û got, "Beriya her tiştî, bi wesîleya salvegera 40'î ya damezrandina partiya me, ez Rêber Apo silav dikim. Şehîdên me ku em gihandin vê astê, bi rêzdarî û minetdarî bi bîr tînim. Di dîroka partiyê de 40 sal gelekî girîng in. Hema bêjin nîv sed sal e. Serdemeke beriya van 40 salan heye. Hevaltiya ku Rêber Apo bi Hakî Karer û Kemal Pîr re kir, nîqaşên wan, biryardariya wan, îradebûna wan. Ev pêvajo ji 40 salî zêdetir e. Serdemeke ji 45 salan e. Her saleke van 45 salan bi têkoşîneke mezin derbas bûye."

'DI BERXWEDANA 45 SALAN DE BERDÊLÊN GIRAN HATIN DAYIN'

Şerîk diyar kir, di berxwedana 45 salan de berdêlên giran hatine dayin, bi hezaran şehîd hatine dayin û wiha dewam kir: "45 salan şehîd hatin dayin, berdêlên giran hatin dayin, zor û zehmetiyên mezin derketin holê û di nava van hemûyan de têkoşîneke xurt pêk hat. Ev yek danheviyek mezin e. Bidestxistina hêzeke mezin e. Li ser bingeha vê hêz û danheviya mezin, serdemeke nû dest pê kir.

Lewma 40 salên PKK'ê bi danhevî û zemîna xurt bûye misogeriya paşerojê. Di heman demê de misogeriya serketinên ji niha û pê ve ye. PKK bi rastiyeke wiha dest bi sala 41'ê dike."

YÊN DIGOTIN 'WÊ NEMA NAVÊ WÊ JÎ BÊ HILANÎN' JI HOLÊ RABÛN

Şerîk bal kişand ser gefên rayedarên şerê taybet ê Tirk ku qala tinekirina PKK'ê dikin û got, "Digotin, 'Wê nema navê PKK'ê jî bê hilanîn'. PKK'ê 40 sal li pey xwe hişt û dest bi sala 41'ê dike. Her kes li ser PKK'ê diaxive. Hêzên navneteweyî civînan li dar dixin, biryaran didin. Dema ku biryarên xwe didin, PKK'ê esas digirin û li gorî vê yekê biryarê didin. Vaye herî dawî DYA'yê li dijî kadroyên pêşeng ên tevgera me biryar da. Biryara DYA'yê jî nîşan dide ku PKK hîn jî siyaset û rojevê diyar dike.

Ji ber vê yekê, hêz, kes û rejîma şerê taybet a Tirk ên digotin, 'Wê kes nema karibe navê PKK'ê hilîne' dixwazin bi van gotinan têkçûna xwe binixumînin. Ev rastî vê wextê bi zelalî eşkere bû. Sala 1996'an Tansû Çîller jî li meydanan dikir qareqar û digot, 'PKK diqede, wê biqede'. Çi pê hat? Tansû Çîller bi xwe qediya."

Cemal Şerîk anî ziman, PKK misogeriya paşeroja Kurdistanê ye û got, "Hêviya gelê Kurdistan û Rojhilata Navîn diparêze. Bi gavên ji xwe bawer ber bi paşerojê ve dimeşe. Ev yek ji bo gelên cîhanê jî tê heman wateyê. Destpêkirina sala 41'ê wê têkoşîna PKK'ê ya ji bo salên bê jî raxe pêş çavan."

'TÊKOŞÎNA PKK'Ê REJÎMA ŞER A TIRK DITIRSÎNE'

Endamê Komîteya Navendî ya PKK'ê Şerîk işaret bi tecrîdkirina Rêberê Gelê Kurd Abdullah Ocalan kir û wiha bi mijarê daket: "Sala 41'ê ya PKK'ê wê di têkoşîna azadiya welatê me û azadiya Rêberê me de bibe saleke diyarker. Damezrînerê PKK'ê Rêber Apo ye. Êrîşên li dijî PKK'ê ji êrîşên li dijî Rêber Apo cuda nînin. Tecrîda şidandî vê rastiyê radixe pêş çavan. Her ku PKK bi têkoşîna xwe nêzî azadiyê dibe, gav bi gav bi pêş ve diçe, rejîma şerê taybet a Tirk hîn bêhtir ditirse. Ji ber vê yekê bi rengekî giran Rêber Apo tecrîd kirine.

Lewma, li dijî rêveber û kadroyên pêşeng ên tevgera me ew biryar dan. Sala 41'ê ya PKK'ê wê were wateya têkbirina tecrîdkirina Rêberê me û parçekirina plana xayin a li dijî kadroyên pêşeng ên tevgera me. Li ser vê bingehê em dest bi sala 41'ê dikin.

Bi wesîleya vê roja watedar, em careke din dixwazin bêjin ku dilsozê Rêber Apo ne, dilsozê şehîdên xwe ne."