Her ku diçe piştgirî ji bo kampanyaya “Ji Abdullah Ocalan re azadî, ji pirsgirêka Kurd re çareserî” zêde dibin. Welatparêzên başûrê Kurdistanê der heqê girîngiya kampanyayê û azadiya Rêberê Gelê Kurd Ebdulah Ocalan de ji ANF’yê re axivîn û gotin: “Em wek gelê Kurd tune nabin, em ji nav naçin!”

Dayika sê şehîdan Dayke Kurdistanê bal kişande ser girîngiya azadiya Rêberê Gelê Kurd Abdullah Ocalan û got: “Wek jineke Kurd û dayika şehîdan peyama min ew e ku divê di zûtirîn demê de Rêberê Gelê Kurd, rêberê aştiî, azadî û aramiyê azad bibe. Azadiya Rêber Apo azadiya gelê Kurd e û eger Rêber Apo azad nebe, em wek gelê Kurd jî azad nabin.”

Dayke Kurdistanê behsa êrişên dirindane yên Dewleta Tirk a dagirker kir û got: "Dewleta Tirk çekên kîmyewî li dijî hevalên me bi kar tîne. Em wek gelê Kurd tune nabin, em ji nav naçin. Em wek gelê Kurd em ê her tim bimînin."

“ÇARESERIYA SEREKE LI BA RÊBER APO YE”

Bavê şehîd, Amanc Heme Reşîd jî wiha got: “Ev kampanya wê heta 14’ê Sibatê bi belavkirina pirtûkên Rêber Apo, konferans û semîneran berdewam bike. Em jî wek gelê Başûr heta azadiya fîzîkî ya Rêber Apo, em ê beşdarî vê kampanyayê bibin.”

Amanc Heme Reşîd di berdewamiya axaftinên xwe de ev tişt anîn ziman: “Bê Rêber Apo pirsgirêka Kurd li tu parçeyekî Kurdistanê çareser nabe. Çareseriya sereke li ba Rêber Apo ye.”

“PÊWÎST E JIN Û CIWAN  JÎ BEŞDARÎ KAMPANYAYÊ BIBIN”

Aktîvîsta jin Edîbe Eliyê bal kişande ser girîngiya beşdarbûna ciwan û jinan û wiha got: “Ez wek jineke azad, ji bo azadiya Rêber Apo û azadiya gelê Kurd, bang li ciwan û jinên têkoşer dikim ku beşdarî xwepêşandanan bibin. Peyama min ji bo gelê Kurd ew e ku heta Rêber Apo ji zindan û tecrîdê rizgar dibe, her tim xwepêşandanan bikin.”