Greva birçîbûnê ya bêdawî-bidorveger a  li dijî tecrîdkirina Rêberê Gelê Kurd Abdullah Ocalan ya li avahiya nûnertiya HDP’ê ya Başûrê Kurdistanê di roja 184’an de ye. Li aliyê din greva birçîbûnê ya bêdawî-bêdorveger a Nasir Yagiz jî di roja 184’an de didome.

Îro şandeyek ji bijîşkên Başûrê Kurdistanê serdana berxwedêrên greva birçîbûnê kirin û rewşa Nasir Yagîz  kontrol kirin. Li ser navê şandeyê Dr. Mecîd Hememîn têkildarî rewşa Yagiz axivî û got; “Em şandeyek ji bijîşkên Başûrê Kurdistanê hatin serdana çalakiya greva birçîbûnê û Nasir Yagiz ku ev  184 roj in di çalakiya greva birçîbûnê ya bêdawî û bêdorveger de ye. Rewşa tendirûstiyê ya Nasir gelek xira bûye, lê îrade û berxwedana Nasir van astengiyan derbas dike. Ev çalakiyên greva birçîbûnê çalakiyên medenî ne û ji bo azadiya Birêz Ocalan e”

Hememîn bi domdarî got; “ “Pêwîst e hemû xebat û têkoşina Serok Apo bê berçav girtin. Çalakiyên greva birçîbûnê li Bakûr û Başûrê Kurdistan, Tirkiye û Ewropa bênavber bi berxwedaneke mezin berdewam dikin. Em hatin serdana heval Nasir û me rewşa wî ya tendirûstiyê kontrol kir. Em hêvîdar in ku daxwaza Nasir û tevahî çalakgeran were pêkanîn. Bi destpêkirina pêvajoyek nû wê li Bakûrê Kurdistan û Tirkiye aramiyek ya siyasî derbikeve pêş û bi azadiya Serok Apo re jî wê ev rewş baştir bê dîtin. Em hêvî dikin ku rewşa tevahî çalakgeran baş be. Rewşa tendirûstiyê ya Heval Nasir gelek xerab e.”