Şahidê komkujiyên dewleta Tirk: Mam Ezîz!
Welatiyê Bradostê Mam Ezîz yê 60 salî ji sala 1984'an ve komkujiyên dewleta Tirk yên li Kêlaşîn û herêma Bradostê weke rojnivîsekê li gel xwe nivîsiye. Mam Ezîz diyar kir ku tenê PKK wan diparêze.
Welatiyê Bradostê Mam Ezîz yê 60 salî ji sala 1984'an ve komkujiyên dewleta Tirk yên li Kêlaşîn û herêma Bradostê weke rojnivîsekê li gel xwe nivîsiye. Mam Ezîz diyar kir ku tenê PKK wan diparêze.
Mam Ezîz 60 salî ye û ji gundê gundê Jîle yê navçeya Sîdekan a Hewlêrê ye. Bi xwedîkirina lawiran jiyana xwe didomîne. Her sal werza Biharê berê xwe dide zozanên Kêlaşînê. Vê jiyana ku bapîr û bavê wî mayî bi vî awayî didomîne. Mam Ezîz ragihand ku bav û bapîrên wî li ser vê xakê karê lawirvaniyê kirine û her werza Biharê berê xwe didin zozanên Kêlaşînê. Mam Ezîz di werza Zivistanê de li gund û di werza Havînê de jî li Kêlaşînê dimîne.
Mam Ezîz ne tenê şivaneke, di heman demê de dîroknasekî herêma Kêlaşîn û Bradostê ye. Mam Ezîz tenê dibistana seretayî xwendiye û ji sala 1984’an ve komkujiyên dewleta Tirk a dagirker ên li herêma Bradost û Kêlaşînê li gel xwe nivîsiye û rojnivîsek çêkiriye. Heta niha 34 lênûs tejî kiriye. Bûyerên li herêma Kêlaşîn û Bradostê qewimîn li van 34 lênûsan nivîsiye. Piranina nivîsan li ser êrîş û komkujiyên dewleta Tirk ên li vê herêmê ne.
JI LÊNÛSA MAM EZÎZ
Mam Ezîz ji lênûsa xwe têkildarî komkujiyên dewleta Tirk a dagirker ên li herêma Kêlaşîn û Bradostê wiha radigihîne;
"Balafirên şer ên dewleta Tirk, sala 1998’an li Lolanê li sivîlan xistin; 84 zarok, jin û welatiyên pîr qetilkirin.
Sala 1997’an li Bradostê li malekê xistin, 7 kes kuştin.
Sala 1992’an li gundê min Jîlê xistin; 8 kes kuştin.
Sala 1995’an li Deştê Hertê li gundekî xistin; 6 kes kuştin.
Sala 2000'î li Kendakolayê xistin; 39 zarok, jin û welatiyên pîr kuştin."
'TENÊ GERÎLA ME DIPARÊZE'
Mam Ezîz diyar kir ku ji êrîşên dewleta Tirk a dagirker zirareke mezin dîtine û wiha domand; "Me nekarî erdê xwe biçînin. Zozanên me şewitîn. Lawirên me birçî man. Li hinek herêman welatiyên me yên sivîl mirin."
Mam Ezîz bêdengiya hikûmeta herêmê ya li dijî dagirkeriyê rexne kir û got, tenê PKK û gerîla wan diparêze. Mam Ezîz herî dawî got, divê di nava Kurdan de bi teqez yekitî çêbibe.