Tevî ku di dawiya hefteyê de ji jendermeyan hate ragihandin jî ji ber berfê û zîpikê karê lêgerînê nehatibû destpêkirin.

Tîpên 112 Servîsa Lezgîn, AFAD, ÛMKE û Jendermeyan sibeha Duşemê şandin herêmê, lê belê ji ber berfê û şert û mercên giran ên hewayê nekarîn xwe bigihînin herêma bûyerê.

Rayedarên xwecihî diyar kirin, li navçeya Ebexê li herêma ku hate ragihandin 13 penaber qerisîne bi başbûna rewşa hewayê re wê tîmên nû bişînin.

Keyayê gund Şaban Ulgen diyar kir ku li ser sînor heta niha karek nehatiye kirin.

Trajediya penaberan di 9'ê Sibatê de li gundê Sariçîmen ê navçeya Ebexê rû dabû. Ji penaberên ku hewl dan ji sînor derbas bibin 10 jê Efgan û 3 jî ji Kobanê bûn û tê texmînkirin ku qerisîne. Heta niha ti penaber nehatiye dîtin. Walîtiya Wanê tenê got ku karê di vî warî de dewam dike.

Keyayê gundê Sariçîmenê Şaban Ulgen diyar kir ku di navbera gundê wan û sînor de tenê 10 kîlometre heye.

Ulgen îdîa kir ku heta niha ti nîşane nîne ku li ser sînor 13 kes qerisîne û got, "Heta niha li ser sînor û derdora gundê me cesedê kesekî qerisiye nehatiye dîtin. Di vê mijarê de em bi walîtî û rayedaran re diaxivin."

Ulgen got, "Tîmên walîtiyê diviyabû îro (roja Duşemê) bihata, lê belê ji ber şert û mercên giran ên zivistanê nekarîn bên. Ne gundiyên me, ne jenderme ne jî kesekî din cenaze nedîtine. Eger em li ser sînor cenazeyan bibînin em ê ji raya giştî re ragihînin."

LI WANÊ DI NAVA SALEKÊ DE 37 PENABER QERISÎN

Li gorî parêzvanên mafên mirovan, li Wanê di sala 2019'an de herî kêm 37 penaber qerisîn û jiyana xwe ji dest dan. Drama penaberan ne tenê ev e. Di Tîrmeha 2019'an de wesayiteke bazirganên mirovan ku penaber tê de bûn qelibî û di encamê de 17 kesî jiyana xwe ji dest dan û 50 kes jî birîndar bûn.

Herî dawî di 9'ê Sibatê de zêdeyî 30 penaber li qiraxa gola Wanê hatibûn dîtin ku hindik mabû biqerisin.

Serokê Şaxê Wanê yê Komeleya Mafên Mirovan (ÎHD) Mûrat Melet diyar kir ku li ser sînorê Tirkiye-Îranê di nava sê salên dawî de bi sedan kes qerisîn û got, "Piraniya cenazeyên dema ku berf dihele tên dîtin."