Tevgera Jinên Ciwan ên Kurd (TekoJIN) a li welatên Ewropayê rêxistinkirî, bi şiara ‘’Wêrekiya dîtina xewnan, wêrîna ji bo azadiyê ye’’ kongreya xwe ya 2’emîn li dar xist. TekoJIN’ê kongreya xwe ya jinên ciwan a 2’emîn li Zanîngeha Goethe ya Frankfûrta Elmanyayê li dar xist. Ji gelek welatên Ewropayê jinên Kurd û enternasyonalîst bi cil û bergên xwe yên gelêrî tev li kongreyê bûn. Wêneyên şehîdan, alên TekoJIN û JXK’ê û wêneyên Rêberê Gelê Kurd Abdullah Ocalan li salona kongreyê hatin daliqandin.

Kongre bi girtina rêzê ji bo şêhîdên şoreşa Kurdistanê destpê kir. Di pey re TekoJIN û TJK-E’yê axavtinên destpêkê kirin.

Di kongreyê de bi giştî gotûbeja hêza rêxistinkirî û rol û ristê jinên ciwan di nav civakê de hat kirin. Di têkoşîna şoreşê ya bi salan a gelê Kurd de, di avakirina konfederalîzma demokratîk û ya cîhaneke azad a civakî û ekolojîk de behsa rolê jinên ciwan hat kirin.

Di kongreyê de wiha hat gotin: “Jinên ciwan xwe bi rêxistin bikin, dikarin li ber dijminê faşîst rabin û Kurdistana azad ava bikin.“

Piştî axaftinan sînevziyona li ser pêvajoya siyasî hat temaşekirin û nîqaşa pêvajoya siyasî hat kirin. Bi pişt re rapora xebatên du salan hat xwendin û jinên ciwan, pirsgirêkên xwe yên di warên dixebitin de û çareserî pêşniyarên alternatîf anîn ziman.

Rêziknameya TekoJIN’ê hat xwendin. Plansazî hat çêkirin. Koordînasyona nû a TekoJIN’ê hat hilbijartin û jinên ciwan diyar kirin ku ew wek hêzeke ji nû ve rêxistinkirî amade ne.

Kongre bi vê axaftinê bi dawî bû: ‘’Bi vê kongreya xwe aşkera ye ku em ê bi awayekî bihêztir û fedaîtir tev li pêvajoyê bibin. Şerê li welatê me diqewime û berxwedana hêja ya gerîla xeta divê em jinên Kurd ên li Ewropayê bişopînin nîşanê me dide.“