Parlementer Mursel Nebîzade (32) ya ku beriya Talîban di sala 2021’an de desthilatdariyê bi dest bixe, parlementerî dikir li Kabîlê li mala xwe hate qetilkirin. Di êrişê ew û parêzvanê wê hatin kuştin, birayê wê û parêzvanekî wê jî birîndar bûn.

Tevî ku Talîban li welêt bûbû desthilatdar jî Nebîzade ji welat derneketibû. Nebîzade di sala 2018’an de li Kabîlê weke parlamenter hatibû hilbijartin û heta desthilatdariya Talîbanê jî li ser karê xwe bû.

Ji parlamenterên berê Mariam Solaimankhil têkildarî qetilkirina Nebîzade axivî û got: “Ew pêşengeke rasteqîn bû. Keseke bi hêz bû ku ji bo tiştên jê bawer dikir, dengê xwe bilind dikir.”

Endama Parlamentoya Ewropayê Hannah Neumann jî têkildarî kuştina Nebîzade got: “Xemgîn im, bi hêrs im û dixwazim hemû dinya bi vê bizane. Dibe ku ew di tariyê de hatibe kuştin lê Talîban pergala cihêkariya zayendî li pêş çavan ava kir.”