Li Kantona Qamişlo bi hezaran jin hatin ba hev û li dijî qetilkirina Jîna Emînî meşiyan. Jinan di meşê de wêneyê Jîna Emînî hildan û bê navber dirûşmeyên “Jin jiyan azadî“ berz kirin. Endamên saziyên jinan ên kantonê, endamên Meclîsa Malbatên Şehîdan, nûnerên partiyên siyasî, saziyên civaka sivîl û bi hezaran jinên kantona Qamişloyê tev li meşê bûn. Meş ji Çerxerêya Osman Sebrî ya Qamişloyê dest pê kir û heta Çerxerêya Şehîd Rûbar Qamişlo berdewam kir.

Li çerxerêyê, ji bo diyarkirina hêrs û nerazîbûna xwe ya li hember biryarên li ser jinên Rojhilat û Îranê tên kirin, bi dehan jinan porê xwe birîn û desmalên xwe şewitandin.

Li vir ewilî endama Koordînasyona Kongra Star Rîhan Loqo axivî û got: “Em ê berxwedan û piştgiriya xwe ya ji bo jinên Rojhilatê Kurdistanê û çalakiyên xwe bidomînin. Hêz û berxwedana jinên Kurd şoreş gihand asta ku niha tê de ye."

Rîhan Loqo bang li hemû jinên Kurdistanê kir ku li dijî zîhniyeta baviksalar têkoşîna xwe bilind bikin û bi erka xwe rabin û wiha domand: "Keziyên jinên Kurd dê her tim li pêş bin û di rizgarkirina jinên Kurdistanê û cîhanê de ji zîhniyeta hegemon a baviksalar xwedî roleke bi bandor bin."

Rihan Loqo di dawiya axaftina xwe de sersaxî ji malbata Jîna Emînî û hemû jinên têkoşer re xwest û soza şopandina rêya wan heta bidestxistina azadiya jinan da.

Xwepêşandan bi berzkirina dirûşmên silavkirina berxwedana jinan bi dawî bû.