Meclîsa Jinê ya HDP'ê daxuyaniyeke nivîskî weşand û diyar kir, "Windakirina Gulistan Dokû nekin amûrek ji bo zexta li ser mûxalefetê. Hesab bidin, Gulistan li ku ye?"

Di daxuyaniyê de hate gotin, "Têkildarî Zaînal Abarokov ku hevalê Gulistan bû û bersûcê yekane yê windakirina wê ye, lêpirsîneke têrker nehate meşandin û îfade û delîlên ji bo dîtina Gulistan ji raya giştî hatin veşartin û lêkolîneke bi bandor nehate kirin."

Meclîsa Jinê ya HDP'ê ragihand ku rayedarên berpirsyar ên ku guhê xwe ji îdîa û delîlan digirin windakirina Gulistan dixwazin bikin amûrek ji bo zexta li ser mûalefetê. Meclîsê nerazîbûn nîşanî serdegirtina Rêxistina ESP'ê ya Amedê da ku bi vê hincetê hate kirin.

Meclîsa Jinê ya HDP'ê ragihand ku desthilatdarî bi vê serdegirtinê hewl dide destgîrkirin û girtinê binixumîne û destnîşan kir, "Mûxatabê bingehîn hevkariya dewlet-mêr e ku Gulistan dan windakirin û di nedîtina wê de israr dikin."