Ji bo çalakiya 1'ê Mijdarê ya li ber avahiya OPCW a li bajarê Den Haagê yê Hollandayê û çalakiya li bajarê Dusseldorfê yê Elmanyayê ku 12'ê Mijdarê wê were lidarxistin, delegeyên kongreya YJK-E'yê banga tevlîbûnê kirin.

Hevseroka KON-MED'ê Zubeyde Zumrut û Berdevka TJK-E'yê Ayten Kaplan bi navê delegeyan axivîn.

Zubeyde Zumrut 17 şervanên azadiyê yên di êrîşên çekên kîmyewî de şehîd bûn û şehîdên şoreşê hemû bi bîr anî û destnîşan kir ku di kongreyê de ji bo bibin hilmek ji gerîlayên azadiyê de îdîa û biryardariyeke mezin hatiye destnîşankirin. Zubeyde Zumrut anî ziman ku li hemberî êrîşên qirkirinê ku li Zap, Avaşîn û Metînayê têne meşandin, jinên Kurd ên li Ewropayê wê têkoşîneke bênavber bimeşînin.

Hevseroka KON-MED'ê Zumrut ji bo çalakiya 1'ê Mijdarê ya Den Haagê û çalakiya 12'ê Mijdarê ya li Dusseldorfê ku wê li dijî êrîşên dewleta Tirk a dagirker ên bi çekên kîmyewî bêne lidarxistin, bang li jinên Kurdistanî, ciwan û xelkê welatparêz, dost û hêzên demokrasiyê yên li Ewropayê kir ku bi ruhê seferberiyê tevlî bibin.

KAPLAN: LI DIJÎ ÊRÎŞÊN KÎMYEWÎ EM TEVLÎ ÇALAKIYAN BIBIN

Berdevka TJK-E'yê Ayten Kaplan jî diyar kir ku bêdengiya NATO'yê ya li hemberî êrîşên kîmyewî yên li Başûrê Kurdistanê tê wateya piştgiriya ji bo êrîşên qirkirinê yên dewleta Tirk a faşîst. Kaplan bi bîr xist ku Elmanya çekan difiroşe dewleta Tirk.

Kaplan destnîşan kir ku li dijî bêdengiya netewe dewletan a li hemberî qirkirina Kurdan ew ê têbikoşin û got, "OPCW divê li gorî armanca damezrandina xwe kar bike."

Ayten Kaplan bang li her beşên civakê bi taybetî jî jinan kir ku beşdarî çalakiyên li Den Haag û Dusseldorfê bibin.

Kaplan her wiha destnîşan kir ku ew bi jin a têkoşer Şebnem Korûr Fîncanci re ne.

Daxuyaniya çapemeniyê bi dirûşmên "Jin, Jiyan, Azadî", "Bijî berxwedana gerîla", "Şehîd namirin", "Bijî Serok Apo" û "Bê Serok jiyana nabe" bi dawî bû.