Hevseroka FED-DEM’ê Sebahat Ergîn di çalakiya Bremenê ya şermezarkirina polîsên Elman ku sazî û welatparêzên Kurd krîmînalîze dike de axivî û got, “Nebin şirîkê dewleta Tirk, Kurdan sûcdar nekin, destên xwe ji komeleyên me bikşînin.”
Navenda Civaka Kurd a Demokratîk a Bremenê Bratî e. V ji bo şermezarkirina serdegirtina mala V û girtina Kadrî Saka li ber Parlamentoya Eyaleta Bremenê çalakiyek li dar xist.
Endamên Meclîsa Eyaletê jî piştgirî dan çalakiya şermezarkirina helwesta dadgerî û polîsên Elman ên krîmînalîzekirina Kurdan û vê pêkanînê şibandin serdema Naziyan.
Li ser navê Înîsiyatîfa Parastina Kurdistanê daxuyanî hat dayîn û ev tişt hat gotin: “Kadrî Saka bi sûcê terorê di çarçoveya qanûna 129b ya ji serdema Naziyan de mîras hatiye girtin, hatiye girtin. Di van rojan de AfD û yên ku faşîzma rastgir protesto dikin, dema ku mijar dibe Kadrî Saka û girtiyên Kurd qanûnên Naziyan pêk tînin.”
EV VERSIYONA DEWLETA TIRK A LI ELMANYAYÊ YE
Hevseroka FED-DEM’ê Sebahat Ergîn wiha axivî: “Bi rastî dema em behsa edalet û demokrasiyê dikin, yên ku xwe weke demokrat, dadperwer û parêzvanên mafên her kesî nîşan didin û îdîa dikin ku li xakeke wiha dijîn ev edalet e. Dema mijar dibe Kurd nayê dîtin. Gelo ev feraseta edaletê taybet ji bo şexsan an jî Kurdan derdixin? Îro êrîşên li hemberî heval Kadrî, komeleyên me û girtina gelek hevalên me di bin navê demokrasiyê de tê kirin. Lê belê ev sîstem versiyona êrîşên dewleta Tirk ên li ser gelê Kurd e. Di bin konsepteke wiha ya edaletê de dixwazin me tune bikin û mafên me ji me bistînin. Ji ber vê sedemê ez bang li dewleta Elman dikim; destên xwe ji komeleyên me rakin! Bi hevkariya dewleta Tirk dest ji girtina hevalên me berdin.”
Di çalakiyê de dirûşmên "Hoch die Internationale Solidaritat", "Bijî berxwedana zindanan", "Freiheit für alle politische Gefangenen" hatin berzkirin.
Çalakiya li ber Parlamentoyê piştî rûniştina deqeyekê bi dawî bû.
