Çalakiya ku ji aliyê Federasyona Civaka Demokratîk a Kurd a Awisturyayê  (FEYKOM) û Şaredariya Viyanayê ve li saloneke mezin pêk hat ku salon ji aliyê Şaredariya Viyanayê ve hate girtin.

Gelek siyasetmedar, hunermend, sendîkavan û kesayetên navdar beşdarî resepsiyonê bûn. 

Gelek kesên navdar ên weke; Şafak Akçay a parlamentera Viyanayê ya partiya SPO’yê,  Harald Troch ê Endamê Meclîsa Neteweyî ya Awisturyayê ya SPO’yê, ji Kongreya Neteweyî ya Kurdistanê Nîlûfer Koç, Mizgîn Ehmed a Nûnera PYD’ê, Ewa Ernst DzÎedzîc a Endama Meclîsa Neteweyî ya Awisturyayê ya Partiya Keskan,  Saya Ahmad a Seroka Şaredariya Viyanayê ya nehemîn,  Andreas Schîeder ê Endamê Parlamentoya Ewropayê û Walter Baîer ê Serokê Koma Çepgiran a Ewropayê beşdarî resepsiyonê bûn.

Di destpêka axaftinan de hate destnîşankirin ku Newroz ji bo gelê Kurd cejna bihar û sala nû  ye û di heman demê de cejneke berxwedanê ye. Hate gotin ku mafê çarenûsiya Kurdan a ku bi qanûnên navneteweyî hatiye misogerkirin, tê înkarkirin.

FEYKOM'ê di axaftina xwe de diyar kir ku hê jî pirsgirêka Kurd nehatiye çareserkirin û hewce ye bi lezgînî were çareserkirin û  hewce ye rehîngirtina Rêberê Gelê Kurd Abdullah Ocalan bi dawî bibe.

Nûnera PYD'ê Mizgîn Ehmedê jî got ku hewce ye Newroz bi ruhê azadiya fîzîki ya Abdullah Ocalan û pêngava ji Kurdistanê re statû, were  pîrozkirin.

Ji Kongreya Neteweyî ya Kurdistanê Nîlûfer Koçê jî di axaftina xwe de got ku azadî û şoreşa gelê Kurd bi saya Rêberê Gelê Kurd Abdullah Ocalan li seranserê cîhanê belav bûye û diyar kir ku wê têkoşîn berdewam bike.

Ewa Ernst Dzîedzîc a Endama Meclîsa Neteweyî ya Awisturyayê ya Partiya Keskan jî got ku hewce ye di zûtirîn dem de ji bo girtiyên siyasî yên li Tirkiyeyê tedbîr werin standin û ji aliyê dewleta Tirkiyeyê ve girtina welatiyên Awisturyayê nayê qebûlkirin.

Endamê Parlamentoya Ewropayê Andreas Schîederî jî anî ziman ku gelê Kurd ji bo azadiya xwe têdikoş û hêzên demokratîk ên li Kurdistanê gelekî bi hêz in.

Serokê Koma Çepgiran a Ewropayê Walter Baîerî jî destnîşan kir ku dema azadiya fîzîkî ya Abdullah Ocalan hatiye û jiyaneke azad rewatirîn mafê gelê Kurd e.

Di çalakiyê de pêşangeha wêneyan a hunermend Zehra Doganê cih girt û her wiha di çalakiyê de vîdeoya Newrozê ya ji aliyê FEYKOM’ê ve hatebû amadekirin,  hate nîşandan. Çalakî bi stranên kurdî yên hunermend Rizgar Akan û bi gerandina govendê bi dawî bû.

Roja Pêncşemê wê li Votîvparkê bi meşaleyan meşa Newrozê û li Heldenplatzê jî pîrozbahiya Newrozê werin lidarxistin. Şeva Newroza Mezin jî wê li Gasometerê were lidarxistin. Wê di pîrozbahiyê de hunermendên weke Bengî Agirî, Narîn, Bajar û Hîvron Delîl Xidir cih bigirin.