Çalakiyên di çarçoveya pêngava “Ji Abdullah Ocalan re Azadî, ji Pirsgirêka Kurd re Çareserî” ku 10’ê Cotmeha 2023’an de hate destpêkirin, li Swîsreyê dewam dikin.

ST. GALLEN

Komuna Jinê ya Helbest Koçerîn, li Navenda Civaka Kurd a Demokratîk (CDK-SG) xebata atolyeyê li dar xist. Ji Akademiya Jineolojiyê Nora Merîno li ser modeleya jiyana hevpar a Abdullah Ocalan li ser bingeha azadîxwaziya jinê, ekolojî û demokrasiyê pêşkêşî kir. Piştî pêşkêşiyê jinan nîqaşan kirin û çîrokên xwe yên naskirinê bi fikrên Abdullah Ocalan re vegotin.

Piştre di çarçoveya xebata atolyeyê de afîşên ku ji gotinên Abdullah Ocalan pêkdihatin, hatin amadekirin.

CENEVRE

Kampanyaya “Rojên Diyalogê bi Abdullah Ocalan re” ji ber şert û mercên nebaş ên hewayê li Navenda Civaka Kurd a Demokratîk hat lidarxistin. Partiya Komunîst a Swîsreyê, Greva Jinan a Femînîst, Tora Serhildanê û endamên CDK-Ge tevlî bernameyê bûn.

Komîteya pêngavê têkîldarî kampanyayê pêşkêşî kir û beşdaran li ser fikrên Abdullah Ocalan nîqaş kirin.

Piştre beşên ji pirtûkên Abdullah Ocalan ên zimanê Fransî hatin xwendin.

CHÛR

Di çarçoveya kampanyaya “Rojên Diyalogê bi Abdullah Ocalan re” de li bajarê Chûr ê Swîsreyê bernameya xwendinê hat lidarxistin.

Kurdistaniyên li bicihbûna penaberan a Lîtzurîtî ya bajarê Chûrê bi pêşengiya TCŞ û TekoJIN'ê di bernameya xwendinê de li hev civiyan.

Di çalakiyê de li ser fikrên Abdullah Ocalan nîqaş hatin kirin û beşên ji pirtûkên wî hatin xwendin.