Vladîmîr Pûtîn çarêkeke sedsalê ye weke Serokê Dewletê yan jî Serokwezîr li ser desthilatdariyê ye. Li hemberî Pûtîn tenê 3 namzet hene. Lê şansê wan nîne ku bên hilbijartin.

Ji Partiya Demokrat a Lîberal a Rûsyayê Leonîd Slûtskî, ji Partiya Gel a Nû Vladîslav Davankov û ji Partiya Komunîst Nîkolaî Kharîtonov li hemberî Pûtîn in.

Dema mirov vê hilbijartinê bi hilbijartinên sala 2018’an re bîne berhev, tê dîtin ku ji hejmara namzetan 4 kes kêm bûne. Ev jî weke nîşaneya tengbûna qada siyasî, hate nirxandin.

Vladîmîr Pûtîn ê 71 salî, tenê di navbera salên 2008-2012’an de nebûbû serokkomar.

Li hemberî Pûtîn muxalefeteke rast tune ye. Tê payîn ku wê Pûtîn heta 2030’an li Kremlînê be, yanî wê ji bo 6 salên din jî dîsa bê hilbijartin. Di sala 2030’an de dikare ji nû ve bê hilbijartin û heta sala 2036’an ku wê bibe 84 salî, li ser wezîfeyê be. Pûtîn di sala 2018’an de bi sedî 76,7 dengan, hatibû hilbijartin.