76’emîn rojbûna Rêber Apo li banliyoya Drancy a paytext Parîsê bi coş hat pîrozkirin. Endama TJK-E’yê Gonul Kaya di pîrozbahiyê de axivî û got, "Nirxên ku Rêber Apo afirand têkoşîna jinên Kurd gerdûnî kir û nêzî azadiyê kir."
76’emîn rojbûna Rêber Apo li banliyoya Drancy ya paytexta Fransa Parîsê bi girseyî hat pîrozkirin.
Pîrozbahiya bi pêşengiya Meclisa Jinê ya Zînê ya Drancyê hat lidarxistin, bi deqeyek rêzgirtina ji bo bîranîna şehîdên azadiya Kurdistanê destpê kir.
Kurdistanî bi taybetî zarok û jin beşdarî pîrozbahiyê bûn. Li ser navê Tevgera Jinên Kurd a Ewropayê (TJK-E) Gonul Kaya axivî. Gonul Kaya têkildarî nirxên ku Rêber Apo ji bo Kurdistanê afirandiye ev tişt anî ziman: "Gelê Kurd bi rojbûna Rêber Apo re ji nû ve ji dayik bû. Têkoşîna 50 salan a Tevgera Azadiya Kurd îfadeya vê yekê ye. Dema em li 50 salên dawî yên Kurdan dinêrin, em vê yekê vekirî dibînin. Dayika Ûveyş bû dayika gelê Kurd."
Di pîrozbahiyê de ji bo zarokan jî lîstik û vegotinên taybet hatin pêşkêşkirin. Jiyana Rêber Apo bi dîmen ji zarokan re hat vegotin. Ji bo zarokan jî resim û lîstikên taybet hatin organîzekirin.
Di pîrozbahiya ku malbatên şehîdan jî amade bûn de hunermendên TEV-ÇAND'ê derketin ser dikê. Deza Amed, Farqîn û Nûarîn bi stranan gel coşandin. Pîrozbahî bi govendê bi dawî bû.
