8’ê Adarê Roja Jinên Kedkar ên Cîhanê serî de li Kurdistan û çar parçeyên cîhanê bi coşeke mezin hate pîrozkirin.

HANNOVER

Li bajarê Elmanya Hannoverê çalakiya 8’ê Adarê bi şîara ‘Femînîzmê pêş bêxin, kapîtalîzm û pederşahî ji holê rakin’ hate lidarxistin. Meş li Navenda Platz der Weltaûsstellûng a Hannoverê dest pê kir û jinên Kurd, Tirk û Elman beşdarî meşê bûn. Çalakî ji aliyê zêdetirî 30 rêxistinên jin û saziyên jinan a femînist ve hate organîzekirin.

Jinên Kurd di meşê de belavoka ku ji bo 8’ê Adarê amade kiribûn xwendin. Jinên Kurd stranên Kurdî stran û goven girtin. Meş li Qada Faûst Gelande bi dawî bû.

 MÛNÎH

Li bajarê Munîhê yê Elmanyayê jî jinên enternasyonalîst û Komuna Jinan a Sara û Jinên Tirkiyeyî çalakiya 8’ê Adarê li dar xist. Meş li pêşiya avahiya şaredariya Munîhê dest pê kir. Li ser navê Komuna Jinan-SARA axaftin hate kirin, Şoreşa Rojava û berxwedana Leyla Guven hate silavkirin.

ANVERS

Li bajarê Belçîka  Anversê Meclîsa Jinan a Şehîd Silav û saziyên femînîst 8’ê Adarê pîroz kir. Di çalakiyê de peyamên li dijî tecrîdê hate dayîn. Meclîsa Jinan a Anvers bal kişand li ser grevên birçîbûnê yên bi pêşengiya Leyla Guven û tecrîda Îmralî.

SWÊD

Li gelek bajarên Swêdê ji bo 8’ê Adarê Roja Jinên Kedkar ên Cîhanê çalakî hatin lidarxistin û di çalakiyan de Leyla Guven û çalakgerên grevên birçîbûnê hatin silavkirin.

STOCKHOLM

Li paytexta Swêd Stockholmê di çalakiya 8’ê Adarê de Leyla Guven û çalakgerên greva birçîbûnê hatin silavkirin.

Di çalakiyê de li ser navê Yekîtiya Jinan a Sara û Meclîsa Jinan a Kurd ya Amara axaftin hatin kirin û bal hate kişandin li ser grevên birçîbûnê yên li dijî tecrîdkirina Rêberê Gelê Kurd Abdullah Ocalan.

Çalakî ji aliyê Partiya Çep, Partiya Edalet a Sosyalîstan, Yekîtiya Jinan a Sara, Ciwanên Komunîst ên Şoreşger, Partiya Komunîst, Femînîstên Sosyalîst û Meclîsa Jinan a Kurd ya Amara û 11 komele û partiyan ve hate organîzekirin.

Di çalakiyê de li ser navê saziyan axaftin hate kirin û piştre jin ber bi Qada Sergels Torg a li navenda bajêr ve meşiyan.

GOTEBORG

Li Goteborgê jî Komîteya 8’ê Adarê li Qada Gûstaf Adolfs mîtîngek li dar xist. Jin heta Qada Goteplatsenê meşiyan.

Jinên Kurdistanî bi alayên PKK, TJK-E, YPG/YPJ, wêneyên Ocalan û Leyla Guven beşdarî meşê bûn. Di çalakiyê de belavokên qala grevên birçîbûnê û binpêkirinên mafên mirovan ên li Tirkiyeyê dike, hatin belavkirin.

FALÛN

Li Falûnê ji aliyê 22 partî, sendîka û komele ku di nava wan de Partiya Karkerên Demokrat ên Sosyal, Partiya Çep, Partiya Keskan a Derdor, Sendîkaya Karkerên Metal û Navenda Civaka Demokratîk a Kurd jî cih digire, çalakiyek hate lidarxistin.

Jinên Kurd di çalakiyê de wêneyên Leyla Guven û çalakgerên greva birçîbûnê hildan. Navenda Civaka Demokratîk a Kurd di çalakiyê de daxuyanî da û ragihand ku rewşa Leyla Guven û çalakgerên greva birçîbûnê di qonaxeka metirsîdar de ye.

Ji bo rakirina tecrîdê banga ketina nava helwdanan li partiyên siyasî, sendîka û raya giştî ya demokratîk hate kirin.

MALMO

Li bajarê Malmo Partiya Çep, Înîsyatîfa Femînîst, Çep a Ciwan, Komeleya Vîctor Jara, Komeleya Çanda Iraq, Personelê Tenduristiya Sosyalîst û mamosteyên Dibistana Bilind a Gel ya Kvernyb ji Qada Gûstaf Adolfs heta Mollengovstrogetê meşiyan.

Kurdistanî bi alên YPG/YPJ’ê, wêneyên Ocalan û Leyla Guven beşdarî meşê bûn û piştgirî dan çalakiyên grevên birçîbûnê. Di çalakiyê de belavokên ku dewleta Tirk û tecrîda li dijî Ocalan teşhîr dike, hatin belavkirin.

CREÎL

Li bajarê Fransa Creîlê ji aliyê Navenda Civaka Demokratîk a Kurd ve tecrîda li ser Ocalan hate protesto kirin.

Girseya gel seat 18:30’an li peşiya şaredariya Creîlê kom bûn, bi wêneyên Ocalan û Leyla Guven meşiyan.

Di çalakiyê de dirûşmeyên “Bijî Serok Apo”, “Liberte pour Ocalan”, “Terorîst Erdogan” û “Faşîst Erdogan” hate berzkirin û tecrîdkirina Ocalan hate şermezar kirin. Di çalakiyê de berxwedana Leyla Guven, çalakgerên Strasboûrg û girtiyên PKK û PJAK’ê hatin silav kirin.