Dayika Sûltan a serdana berxwedêrên li Strasobûrgê di grevê de ne kir, bang li Kurdê Ewropayê kir ku rabin ser xwe, daxwaz ji her kesê hate kirin ku 2’yê Adarê di ser de tevlî çalakiya li Kolin û hemû çalakiyên li dijî tecrîdê bên kirin, bibin.
Endama Saziya Malbatên Şehîd û Winda yên Kurdistanê (KOMAW) a rêxistina Belçîka Dayika Sultan û aktivîsta jin Toprak Sert li gel hunermend Sultan û Kurdistaniyê bi navê Necmedîn serdana berxwedêrên li Strasboûrgê ev 74 roj in di grevê de ne kir.
Dayika şehîdan Dayika Sûltan a li vir axivî ji bo Komîteya Pêşîlêgirtina Êşkence (CPT) û saziyên Ewropa got: “Heta ku hûn gavekê neavêtin em ê li kolanan û di nava çalakiyan de bin. Heta em agahiyekê ji Ocalan bigirin, em ê li kolanan bin.”
Dayika Sûltan bibîr xist ku sibe wê li girtîgehên Kurdistan û Tirkiyeyê bi hezaran girtî dest bi grevê bikin û got: “Ev kes ji bo xwe tiştekî naxwazin. Daxwazên Rêbertiya xwe û mafê xwe dikin.”
Dayika Sûltan bal kişand ser berxwedan û tecrîdê û got: “Wiha nabe, tecrîd wiha bi dawî nabe. Heta tecrîda li ser Rêbertiya me bi dawî bibe, em ê li kolanan li ser piya bin û çalakiyan bikin.”
Dayika Sûltan bang li hemû Kurdên li Ewropa kir û got: “Ji bo hemû Kurdên li Ewropa dibêjim; divê bi şev û roj em li ser lingan bin. Mîna berxwedana Kobanê. Çawa ku me Kobanê azad kir, em ê Rêbertiya xwe jî azad bikin.”
Dîsa dayika Sûltan bang kir ku wê roja Şemiyê li bajarê Koln ê Elmanya û gelek navendên Ewropa çalakî bên kirin û mîtîng bên lidarxistin. Dayika Sûltan got: “Divê tevlî van çalakiyan bibin û bêjin êdî bes e.”
Aktivîsta jin a ji Brûkselê hatî Toprak Sêrt jî got: “Em nehatine ser rûyê dinê ji bo mirinê, ji bo jiyanê hatine. Divê çar parçeyên Kurdistanê rabin û dawî li sîstema tecrîdê bînin.”
Berxwedêr Yuksel Koç jî li ser navê çalakvanan axivî û piştgirtiya Kurdên Ewropa silav kir û got: “Ji bo şikandina tecrîdê divê her kes bi awayekî aktîf tevlî berxwedanê bibe.
Di roja 74’an a berxwedanê de jî Kurdistaniyên ji Elmanya, Fransa, Swîsre û Belçîkayê hatibûn serdana berxwedêran kirin.
