Kurdistaniyên li Stockholmê dijîn bi armanca şermezarkirina komploya navnetewî ya 9’ê Cotmeha 1998’an a li ser Rêberê Gelê Kurd pêk hat meşek girseyî lidarxistin. Meş bi pêşengtiya Navenda Civaka Demokratîk a Kurd-Swêd (NCDK-S) û Meclîsa Jinên Amara hate lidarxistin.

Meş di saet 13’an ji bo şermezarkirina komploya 9’ê Cotmehê a li himber Rêberê Gelê Kurd Abdullah Ocalan li parka Norra Bantorget dest pê kir, bi hildana alayên Rêber Apo û pankartên bi nivîsa ku komplo şermezar dikirin rakirin û heya bi parka Normalmstorget a li navenda bajêr dewam kir. Piştî ku meşvan gihane qada mitîngê, hevserokê NCDK-Skandînavya Hemîd Bîten axivî.

Bîten got “Beriya her tiştî em wê roja reş şermezar û lanet dikin. Her wek tê zanîn dixwazin li Başûrê Kurdistanê bi destê hin aliyên Kurd komploya duyemîn li dijî gelê Kurd pêk bînin, li himber şervan û têkoşerên gelê Kurd şerekî pir qirêj tê kirin. Em wan hêzên ku li rex dewleta Tirk a dagirker û hov, şermezar dikin. Êdî her kes dizane kî dost e û kî neyarê gelê Kurd e. Em bang li tevayî cîhanê dikin, heya ku Rêber Apo azad nebe, heya ku gelê Kurd nebe xwedî statu, ev têkoşîn û ev berxwedan wê her berdewam bike. Heya ku yek şagird û tekoşerên Rêber Apo hebe, ev doz wê bidome. En careke dîtir ev roja reş şermezar û lanet dikin, ji paytexta Skandînavya heya bi Îmraliyê silavên xwe rêdikin û her wiha berxwedana gerîllayên me yên ku di çeperan de şerê hebûn û nemanê dikin silav dikin. “

Di mitîngê de parlementerê partiya çep Daniyel Riyazat jî axivî û wî jî salvegera komploya 9’ê Cotmehê a li himber Rêber Apo şermezar kir û daxwaza azadiya ji bo tevayî girtiyên siyasî kir. Her wiha piştgîriya xwe ya ji bo têkoşîn û berxwedana gelê Kurd dubare kir.