Ciwanan diyar kirin ku ew dorpêça li ser Mexmûrê qebûl nakin û  li ber Konsolosxaneya Iraqê bi dirûşmeya "Mexmûr wargeha jiyanê ye, li dijî dagirkirina jiyanê serî hilde" çalakî li dar xistin.

Ciwanên ku çalakiya bêîteatiya sivîl li dar xistin, ev daxuyanî dan:

“Em ciwanên Kurd gav paşde navêjin. Em bi gelê xwe yê Mexmûrê re ne. Ev biryara gel e. Em ê li vir li ber xwe bidin. Em ê jî wekî gelê Mexmûrê tevbigerin û em ê îradeya xwe teslîm nekin. Me îradeya xwe teslîmî dewleta Tirk nekir, em ê teslîmî dewleta Iraqê jî nekin. Ji ber vê yekê em li vir bang dikin. Ev dorpêça ku di heman demê de projeyeke qirêj a dewleta Tirk e, tê wateya dorpêçkirina me hemûyan. Berxwedana li hemberî dorpêçê tê wateya jiyanê. Em ê bi ser bikevin. Rojava û Şengal bi ser ketin, wê Mexmûr jî bi ser bikeve.”

Leşkerên artêşa Iraqê di 20’ê Gulanê de bi dehan wesayîtên zirxî, çekên giran, kepçe û têlan xwestibû dora Kampa Mexmûrê bigirin. Gel li hemberî hewldana dorpêçkirinê li ber xwe da, artêşa Iraqê şikand û di konan de dest bi nobetê kirin.