Ji bo 33 ciwanên ku di 20’ê Tîrmeha 2015’an de li navçeya Pirsûs a Rihayê di encama êrîşa DAÎŞ’ê ya xwekujiyê de hatin qetilkirin, li bajarê Stuttgart ê Elmanayê bîranîn û meş hat lidarxistin.

Bîranîn û meş ji aliyê Tevgera Ciwanên Şoreşger (TCŞ), Jinên Ciwan ên Têkoşer (TekoJIN), Partizan, MLKP,  Defend Kurdistan, Riseup4Rojava, ji rêxistinên Elman ORA Stuttgart, OTKM (Offenes Treffen gegen Krieg und Militarisierung) û Young Struggle ve hat lidarxistin.

Bîranîn û meş bi deqeyek rêzgirtinê ji bo bîranîna şehîdên şoreşê destpê kir.

Girseya ku Stuttgart Lautenschlagerstraße li hev civiyan heta Rathausplatzê bi dirûşmeyan meşiyan û li vir daxuyanî dan. Navên 33 rêwiyên xeyalan yek bi yek hate anonskirin û gel bersiva “dijî" da.

Di tevahiya meşê de ku dirûşmeyên Elmanî, Kurdî û Tirkî hatin berzkirin, hate destnîşankirin ku wê hesaba komkujiyê bipirsin û Şoreşa Rojava hat silavkirin.

Di meşê de daxuyaniya Elmanî ya têkîldarî sûcên şer û komkujiiyên desthilatdariya AKP-MHP’ê hate xwendin. Her wiha nûnerên saziyên ciwanan jî li qada Rathausplatz daxuyanî dan.