BASEL

Ji bo bîranîna 33 ciwanên ku li Pirsûsê di êrîşa DAÎŞ’ê de hatin qetilkirin, ji aliyê Komeleya Karkerên Koçber a Swîsreyê (ÎGÎF), Yekîtiya Jinên Sosyalîst (SKB) û Young Struggle ve li Parka De-Wette çalakî hat lidarxistin. Komên femînîst û şoreşgerên Swîsreyî piştgirî dan çalakiyê.

Çalakî bi deqeyekî rêzgirtinê ji bo şehîdên Pirsûsê destpê kir. Piştre li ser navê Young Struggle daxuyanî hat dayîn. Di daxuyaniyê de wiha hate gotin: “Kobanê di têkoşîna li dijî DAÎŞ’ê de bû xala werçerxê. Parastina Kobanê ji bo DAÎŞ’ê destpêka dawiyê bû.”

Li ser navê Konfederasyona Koçberên Bindest ên Ewropayê (AVEG-KON) Gulderen Sevîm jî wiha got: “Komkujiya Pirsûsê ya 20’ê Tîrmehê careke din nûbûna têkoşîna edaletê ya li dijî rejîma faşîst a qirker nîşan da.”

Di çalakiyê de ev peyam hat dayîn, “Heta ku hesab bê xwestin têkoşîna me dewam bike.”

Meşa ku li Parka De-Wette destpê kir, bi dirûşmeyan heta Parka Claramatte dewam kir. Çalakvanan pankarta “Şehîdên Pirsûsê di têkoşîna me de dijîn” daleqandin avahiya Kolpînghaus û li ser navê çalakvanan xaziya Pirsûsê Guneş Erzurumluoglu axivî û destnîşan kir ku dewleta Tirk ji bo tepisandina Şoreşa Rojava bi DAÎŞ’ê re hevkariyê dike.

ZURÎH

Li ser banga hevbeş a ÎGÎF, SKB û Young Struggle bi tevlîbûna pêkhateyên Tevgera Şoreşa Yekbûyî ya Gelan û şoreşgerên Tirk, li qada Stauffacher a pêşiya dêra St. Jakop çalakî hat lidarxistin. Di çalakiyê de wêneyên 33 rêwiyên xeyalan hatin vekirin û metna daxuyaniyê ya AVEG-KON hate xwendin.

Li ser navê HBDH’ê Turan Etem di çalakiyê de axivî û ev peyam da: “Em ê bi mezinkirina têkoşîn yekbûyî tola 33 rewiyên xeyalan hilînin. Wê tu xeyal nîvço nemîne.”

LOZAN

Ji aliyê Federasyona Karkerên Koçber a Swîsreyê û Yekîtiya Jinên Sosyalîst (SKB) li Navenda Civaka Kurd a Demokratîk (CDK) çalakî hat lidarxistin û şehîdên Pirsûsê hatin bibîranîn. Nûnerên saziyên şoreşgerî, endamên CDK-Lozan û gelek kes tevlî çalakiyê bû.

Hevseroka CDK’ê a Lozanê Aysel Argin şehîdên Pirsûsê bi bîr anî û axaftinek kurt kir.

Hevberdevkê ÎGÎF’ê Huseyîn Torun got: “Ciwan di bin kontrola dewleta Tirk de ji aliyê DAÎŞ’ê ve hatin qetilkirin.

BERN

Li paytexta Swîsre Bernê li qada Reithalle çalakî hat lidarxistin. Pêkhateyên Yekîtiya Hêza Demokratîk a Ewropa (ADGB) û saziyên şoreşger ên Swîsreyî tevlî çalakiyê bûn. Li ser navê ÎGÎF’ê Siyasetmedar Alî Orak axivî û got: “Êrîşên dagirkeriyê ku îro li ser Başûrê Kurdistanê dewam dikin berdewamiya vê komkujiyê ye.”

Alî Orak destnîşan kir ku ew ê ji bo hesaba hemû komkujiyan bi taybet ya Pirsûsê bipirsin wê li dijî faşîzmê li qadan bin.

Hevserokê CDK’ê a Bernê Burhan Karakoç jî mafê axaftinê girt û şehîdên Pirsûsê bi bîr anî.

Her wiha metna daxuyaniyê ya Komîteya Rojava hat  xwendin.