Li Kopenhagê duyemîn konferansa PYD’ê pêk hat.

Bi sedan Kurdistanî û dostên wan tevlî konferansa PYD’ê ya li Albertslund a Kopenhagê bûn.

Di konferansê de nûnerên PYD, Partiya Koalîsyona Sor Kesk a Danîmarka ya Enhedslisten, YNK, GORAN, PJAK, FEY-KURD û KNK’ê amade bûn.

Di konferansê de namzetê parlamenteriyê Pelle Dragsted ê li ser navê Enhedslisten axivî got ku dema têkoşîna şoreşgerî ya li Rojava dîtiye Che Guevara hatiye hişê wî û şoreşa Rojava silav dike.

Eva Flyvholm a namzeta parlamenteriyê û Sekretera Navneteweyî ya Enhedslisten jî got, “Em wek Enhedslisten pêşnûmepirsan didin hikûmeta Danîmarka ji bo çekan ji Kurdan re bişîne û ji bo ji nû ve avakirina Kobanê, di vê mijarê de em dixwazin Wezareta Derve di demeke kurt de bikeve nav tevgerê.”

Di konferansê de der barê rewşa dawî ya li Kurdistan û Rojava agahî hatin dayîn û nirxandin hatin kirin. Rapora kar û xebatan a 2014’an hat xwendin. Di konferansê de her wiha rexnedayîn jî çêbû. Kêmasiyên sala 2014’an ên di kar û xebatan de hatin rexnekirin, hat diyarkirin ku ji bo kêmasî bên derbaskirin divê kar û xebateke hê rêxistinkirî û bi pergal bê meşandin.

Konferans piştî rêveberiya herêma ya Sjælland, Fyn og Jylland  hat hilbijartin bi dawî bû.