Têkildarî şerê li Karabagê ku piraniya nifûsa xwe Ermen in, Sekreterê Giştî yê Neteweyên Yekbûyî (NY) Antonîo Gûterres daxuyaniyek da û bang kir ku pirsgirêk bi rêya danûstandinan bê çareserkirin.

Berdevka Gûterres Spehane Dûjarrîc daxuyanî da û diyar kir ku Sekreterê Giştî Gûterres bi Serokkomarê Azerbaycanê Îlham Aliyev û Serokwezîrê Ermenistanê Nîkol Paşînyan re axiviye. Hate ragihandin ku Gûterres ji lîderên her du welatan xwestiye ku şer tavilê bê rawestandin û dest bi danûstandinan bikin.

Li gorî daxuyaniyê, Gûterres fikarên xwe yên li ser şer parve kir û ji her du aliyan xwest ku xwe ji gotinên "tevdan û sorkirinê" vegirin.

Hate destnîşankirin ku Sekreterê Giştî her wiha diyar kiriye ku ew piştgiriyê dide hewldanên Rêxistina Hevkarî û Ewlekariyê ya Ewropayê yên ji bo rawestandina şer.

Her du welat, di dema jihevketina Yekîtiya Sowyetan de li ser Karabagê şer kirin û di encamê de 30 hezar kesî jiyana xwe ji dest dan. Şer salên 1990'î bi serketina leşkerî ya Ermenan bi dawî bû û li Karabagê komarek hate ragihandin ku tenê ji aliyê Ermenistanê ve tê naskirin.

Şer hefteyên dawî ji nû ve dest pê kir û tê gotin, ji her du aliyan bi dehan kesî jiyana xwe ji dest dane.

Herî dawî hikumeta Ermenistanê nerazîbûn nîşan dabû ku Azerbaycan bi sorkirina Tirkiyeyê provokasyonên xwe zêde kiriye.