Hat zanîn ku Rojnameger Kenan Kirkaya dema ji girtîgehê birin nexweşxaneyê di maşîneya rîngê de rastî lêdanê hat. Reveberê Komeleya Rojnamegerê Hemdem (ÇGD) daxuyanî da û diyar kir ku lêdana Rojnameger Kenan nayê qebûl kirin. ÇGD'ê anî ziman ku Kenan ji ber karê rojnamegeriyê girtî ye û xwest serbest bê berdan. TGS'ê jî êrîşa li dijî Kirkaya şermezar kir.
Hat zanîn ku rojnameger û Nûnerê DÎHA yê Enqereyê Kenan Kirkkaya ku di operasyona li dijî rojnamegerên Kurd a 20'ê kanûna 2011'an de li Enqereyê hat girtin, di 20'ê Mijdarê de dema ji Girtîgeha Tîpa F-1 a Kandirayê birin nexweşxaneyê rastî lêdanê hat. Têkildarî mijarê Reveberê Komeleya Rojnamegerê Hemdem (ÇGD) daxuyaniyek nivîskî da. ÇHD'ê, di daxuyaniyê de anî ziman ku lêdana Rojnameger Kenan nayê qebûlkirin û Kenan ji ber karê rojnamegeriyê girtî ye û xwest serbest bê berdan. ÇHD'ê di daxuyaniyê de wiha got: "Hevalê me û nûçegîhanê DÎHA'yê Kirkkaya ji ber 34 nûçeyên çêkiriye tê darizandin. Dema ji bo tedawiyê ji Girtîgeha Tîpa F-1 a Kandirayê diçû nexweşxaneyê di maşineya rîngê de di 20'ê mijdarê de sewqî nexweşxaneyê hat kirin. Kirkkaya di maşîneya rîngê de rastî lêdanê hat. Em dîsa dipirsin û dibêjin Kenan Kirkkaya çima girtî ye? Kenan Kirkkaya ji ber Kurd e û nûçe çêkrine girtî ye. 34 nûçeyên Kirkkaya wekî delîl hatine nîşandan. Kenan di 20'ê mijdarê de rastî lêdana fîzîkî hatiye. Em vê lêdanê qebûl nakin û rast nabînin. Em li hemberî vê zilmê îsyanê dikin. Em dixwazin bi lezgîn Kenan serbest bê berdan."
TGS: BILA EV BÊHIQÛQÎ BI DAWÎ BIBE
Sendîkaya Rojnamegerên Tirkiyeyê (TGS) jî daxuyaniyek nivîskî da. TGS'ê jî di daxuyaniyê de lêdana Kirkkaya şermezar kir û xwest êdî ev bêhiqûqî bi dawî bibe û xwest Kirkkaya serbest bê berdan.